黃子豐

剩下八個賽日就抖暑，在正常情況下，現階段安排上陣的初出馬，只有兩個目的。一就係操到火紅火綠出嚟求交代，二，就係隻馬反正完全未得，出嚟亂跑一場，希望暑期減啲分，下季好部署。

筆者睇過過去十年嘅數據，原來嗰啲操到火紅火綠，到咗季尾第65個賽日打後，先安排出嚟上陣嘅插班PPG，出賽時除非冇飛，如果飛數够勁嘅，勝出率相當之驚人。

等我話畀大家知，近十年呢啲季尾先操足安排上陣，跑四班直路嘅插班馬，臨場買到2.7倍樓下嘅，十年內有11匹，結果分別有「旅遊皇者」、「經典之星」、「連連歡樂」、「精選八方」、「夢想成金」、「天天同樂」、「嘉應精神」、「舉步生風」八隻贏咗，仲有隻「無可限量」跑第二。換言之，呢啲季尾肯做足功夫攞出嚟跑四班直路，而臨場飛數又信心十足嘅馬，大多數係計得好準唔怕賭嘅。今次頭場蘇偉賢隻「駿馬之曲」，賽前搵潘頓試咗三課閘，血統又早熟，大家到時睇到佢啲飛够勁，不妨跟，馬膽我信呢隻。