黃子豐

「仁仁有餘」初出走勢唔算有乜特別，但跑完第一場後，翌戰隔咗三個星期，再跑番同班同程嘅沙田1200米，仲要抽個12檔，隻馬居然會突然有飛，得七倍。呢次嘅飛數，已值得關注，睇嚟好早好早就已經有人吼實呢匹馬，點知當日包尾而回，輸完呢場後，飛數一下子走晒十分正常，隻馬其後再跑一場，有多少走勢。跑過呢三場後，方嘉柏決定同佢增程，結果一增程，飛數即超強，居然得四倍，比起之前幾場飛數明顯硬淨好多。

「仁仁有餘」首次交出水準跑個第三，算係飛到馬到，翌戰飛數繼續勁即補中。但大家留意下，一匹質新進步，賽績上越跑越好，而且剛剛贏完田草千四嘅馬，上場出動到莫雷拉，居然一啲飛都無。大家只要比較下呢匹馬168嗰場，乜賽績都冇，都有人賭到七倍，381嗰場初次增程跑千四，又賭到四倍。反而上次剛剛贏完千四，再跑同班同程，更搵到雷神，又唔係特別重磅，呢場反而一啲飛都冇。好明顯，隻馬上次擺明未跑已有人知道輸硬。今次換個小朋友上去，開飛已見有人故意打熱到不足兩倍，我睇有啲計，馬膽我信呢隻。