黃子豐

今次十場賽事，真真正正亂局一場，睇嚟睇去第二場單純少少，呢場低班泥地有三匹馬牌面稱先少少。

「火神神樂」上季一再展現能力而交代唔到，今季季初仍在黎廄嘅佢，季初三場其實表現非常一般，結果轉咗去蘇偉賢度，冇乜表現嘅「火神神樂」，轉馬房初出，飛數居然得四倍。好明顯，當其時已有人認為，隻馬轉馬房後已養好，那怕在四班都唔使怕照賭。「南區旺」羅富全頭兩季唔係太急，但係到咗今季，安排明顯唔一樣，大家可以睇睇，隻馬步入今季，馬房季初就不停替佢換配件，結果換咗個半掩防沙眼罩後，突然飛到馬到，呢匹馬季初幾埸根本冇表現，唔應該突然有飛，明顯係當時已有人知道呢個配件係幫到隻馬嘅，而結果加咗新配件嘅「南區旺」，表現又真係長期穩定。「錶之多多」大家只要睇睇啲飛，就知呢匹馬今季肯定係大熱大勇，呢匹馬上季從來冇飛，次次幾十倍巨型冷門，今季初出大敗後，翌戰突然有人賭到兩倍，你話啲錢邊度嚟？結果其後除咗一場谷草1200米，一場1650米跑得唔好外，根本未差過。我睇呢三匹馬，今次都幾惡。