黃子豐
今次介紹頭場兩隻筆者一直有跟開嘅馬。先講隻「領創動力」，呢匹馬上季長期幾十至二百倍，過咗個暑假，潘頓一接手搏兩場，飛數勁到不得了，但摶輸兩場後，飛數馬上開始轉軟弱，好明顯，潘頓搏輸兩場後，清楚知道隻馬有幾多料，繼續夾硬嚟，一來無賠率，二來無把握，極可能從當時起，已有心落五班先交代。今期一至三檔，係得隻「競駿天下」較快，如果「競駿天下」用回近仗跑法留一留，「領創動力」用回季初第一場跑法，一放到底交代有幾出奇。
另「加州活力」在278場次嘅四班條件賽，居然也有重飛，當時碰著「嘉應奇兵」、「準輝煌」、「至尊高超」一樣未驚過。「加洲活力」嗰場搏完後，一口氣三場迫咗喺前列走，場場快步速，結果次次刻意跟前，次次走晒佢，如今連埸退熱後，我睇都輸到人怕，今次再抽個11檔，如果突然改回用留前鬥後嘅跑法，變身一啲唔出奇，大家可考慮買單Q。
評論