香港文匯報訊（記者 子棠) 草蜢成員蔡一傑（傑仔）完成腦部手術後康復歸隊，令「Re：GRASSHOPPER演唱會」世界巡演再次啟動，以及明年4月在紅館舉辦草蜢40周年演唱會；而蔡一傑還配合新歌《老的辣》推出「老的辣撈麵」，寓意大家撈到風山水起，身體健康。
蔡一智說：「『Re ：GRASSHOPPER演唱會』真係同『Re 』呢個字好有緣分，喺傑仔Recover（康復）之後，再Restart（重啟），我哋將呢個演唱會帶去新加坡、澳門、馬來西亞、廣州等地方，同大家一齊Reunion（重聚）。我哋亦都會將好多草蜢經典歌曲Rearrange（重編），希望帶畀大家耳目一新嘅感覺。」他用「打邊爐」形容演唱會重啟，笑說：「同喺香港打邊爐一樣，你打過一次邊爐，點會唔打第二次？食第二次會有唔同感覺。而今次呢鍋邊爐就加咗辣，因為蔡一傑寫咗首新歌《老的辣》，所謂『薑是老的辣』，有唔同食法。所以即使之前睇過都可以再睇，因為係不一樣嘅。」開設網上烹飪節目的蔡一傑笑言不單只有得睇，亦有得食，希望大家多支持推出的「老的辣撈麵」，大家撈到風生水起。蔡一智亦落力為弟弟宣傳：「食咗就咩都有得撈。」
蔡一智續指：「自上次在陳慧琳演唱會上宣布草蜢明年4月在紅館舉行演唱會，親朋好友開始追Call我哋要買飛。我呼籲大家唔好再搵我，Quota（配額）已爆，搵佢哋（兩個拍檔）或者林珊珊（經理人），預計12月公布訂票詳情。」他還預告下月初中秋節，草蜢參與其中一場在廣州舉行的「超級草莓音樂節2025」，將會勁歌熱舞近一個小時﹐屆時會帶月餅、茶和應節食品一齊做Show：「草蜢一齊過中秋，人月三團圓！」
評論