香港文匯報訊 (記者 梁靜儀) 成龍與梁家輝合拍的新電影《捕風追影》，久未跟香港傳媒見面的成龍，大談拍攝趣事及未來拍戲計劃，期間更透露近年少在香港拍電戲以及不退休的原因。
問到相隔20年再與梁家輝合作，成龍表示二人私底下都是好朋友，有時會一齊食飯、傾偈，所以不覺得相隔很久，合作感覺手到拿來，最難是對白很多專業術語，拍動作戲對他而言沒甚難度，而拍文戲時，家輝會在現場會點醒他，動作戲方面他就點醒對方，互相指點，梁家輝笑說:「互相老點。」
不過他直言當初以為梁家輝只演文戲，知道要跟對方有對打戲都嚇一跳，他指動作戲是導演安排而不是他安排，而今次是他的徒弟，成家班第七代擔任動作指導。問到家輝在拍動作戲方面可有潛質？成龍笑說:「我覺得下一屆金像獎，佢可以攞『最佳動作新人獎』。」
家輝表示能夠得到成龍讚譽好光榮，但又搞笑稱他們只是偶然食飯見面，沒有傾偈，並大爆成龍私下的為人:「大哥其實唔係咁開放，私底下係好隱蔽，唔開放畀身邊的人，但今次我遇到個全新嘅成龍大哥，佢對所有新人都有個新教導方式，雖然我唔係細佢好多，喺佢面前都算係新人，佢言行身教，喺電影界好難得，因為每一個人都好自私地做自己嘅事，尤其係香港演員，所以我好感激佢。」
戲中飾演反派的梁家輝要用刀刺成龍，拍攝時二人不單親身上陣，更出動真刀拍攝，成龍指由於要一鏡拍到底，所以不能驚：「家輝第一刀就篤落我隻眼到，我叫佢唔駛驚、冇事冇事，因為如果佢一驚就唔夠膽再做。（用真刀驚唔驚？）梗係驚啦！我搵菜刀劈佢嗰時都驚呀！」
梁家輝更憶述其中一場戲他一刀劈落木樑上，更劈斷三條頭髮跌落面上，不過他大讚成龍的動作電影真的無懈可擊，因他永遠追求真實，不用替身，親身上陣。他又笑言跟成龍加埋已138歲，已取得樂悠咭，希望觀眾睇完都滿意。
從影多年，成龍為求真實感，堅持親身上陣，不用替身的習慣：「拍攝前同導演開會研究打法，盡量自己打、真人打，唔係用AI科技，我哋走返傳統啲。」
梁家輝大讚成龍近十年在文戲進步神速，廿年前成龍第一次叫他拍動作戲，跳崖又被老虎追，把他嚇驚了，但今次在演藝人生道路上，幸好有這位哥哥，令他更進一步，邁向明天。問到可有打上癮？梁家輝說:「如果成龍指導，加上成家班的領導，我一千個放心，雖然年紀大咗，每一日參演新戲都係一個進步，好希望能夠同成龍一齊進步。」
評論