香港文匯報訊（記者 阿祖）黃貫中（Paul）歷時12年心血打造的全新大碟《碎片》將於本月21日面世，大碟共8首歌，更會推出黑膠唱片，令一眾搖滾粉絲翹首以盼。Paul坦言呢張專輯是他對音樂的一個承諾，因為入行時首張唱片就是黑膠碟，今次再出黑膠碟是他對音樂初心的回歸。
Paul表示：「今次大碟嘅歌，全部都係我鍾意，原本預先做咗四五十首歌，一有少少我唔鍾意，我就唔要，最終只保留《彗星》《廣東道》《碎片》等幾首滿意之作。」Paul又坦言相隔多年再次出碟並不緊張：「平常心，其實今次係對自己嘅一個交代，容許我自私啲，冇乜特別期望，只係為音樂而做，自己入行40年，唔知自己幾時再有能力做出一隻碟，可能呢一隻就係最後一隻，好難講，畢竟我都61歲了。」
Paul對每一首歌都一絲不苟，早前為歌曲《彗星》拍MV，於酷熱天氣下到戶外車房穿黑色西裝拍攝，除了要彈結他，還要跟狗狗互動，展現專業態度。他指：「上一次拍MV都唔記得幾時，起碼係10年前；今次拍攝過程係熱啲，但出嚟效果好好。」
提到太太朱茵與囡囡黃鶯可有聽過他即將面世的新碟？Paul笑言：「佢哋不經意會聽到，好少喺屋企播自己啲歌，有時我喺屋企check下歌詞、check下編曲，佢哋間中聽到。囡囡實話爸爸嘅嘢係好聽，都唔知真定假，所以唔問佢意見。」至於囡囡可有遺傳Paul的音樂天分？Paul謂：「𠵱家Feel到佢鍾意，佢想學，我隨時教，佢本身有學鋼琴、小提琴，我睇佢團火幾時着，始終屋企有好多樂器，佢容易接觸到，由細到大都對着結他，但佢好少問，最近開始問我邊支打邊支，開始好奇。」
評論