香港文匯報訊（記者 子棠）有「美女廚神」之稱的蔣怡（Coco）近日主持HOYTV飲食競技節目《領廚爭霸戰》，她透露感覺好新鮮：「雖然之前有主持美食節目，但比賽形式係第一次，我好鍾意做，因為本身都好鍾意食嘢，又鍾意睇人煮嘢，亦好鍾意批評下人哋煮嘅嘢，所以呢個職位對於我嚟講係一啲都唔辛苦。」
說到其中有一場明星賽，Coco就直言非常辛苦：「當日我簡直係一個奶媽！因為佢哋真係太唔識煮餸，本身已經冇乜期望，但冇諗過咁混亂，當然喺娛樂性方面係攞100分；其中有一啲真係行嚟行去冇做過嘢，仲搞搞震，同啲美女將啲食物掟嚟掟去，我即刻stop佢哋，話食物唔可以用嚟當玩具！而有啲評判仲衰，被美女迷惑，嗲到佢哋連比賽over time（超時）都唔理，真係激死我！」
說到子女日漸長大，Coco慶幸他們仍然很黐身：「雖然阿女今年升中學，但係仍然都好黐我，例如佢早前去咗個camp，每晚瞓覺之前都會視像話好掛住我。我老公更加會陪個女追星，佢會靜雞雞買咗啲飛，跟住我哋就瞞住個女，話嗰日要去補習，最後阿女先知道原來係去睇BLACKPINK演唱會！個女開心到癲。而囝囝今年就7歲，仍然好似個BB，有時同我去外地做嘢，如果可以同我一齊瞓嘅話佢就已經好開心，令我覺得好sweet。」
評論