兆　文

第七場第四班1200米。「彩虹七色」縱使初出即跑第二，但貼欄慳位形勢有利，且頭馬締速偏快，當時認定是弱組賽事，對這個亞軍有所保留，事後睇番大錯特錯，因為頭馬「金創福威」再出再贏，上周再增添一個第三名，季軍「幸運多彩」更犀利，往後兩戰兩勝充滿星味。

來自強組的「彩虹七色」，前仗再出一樣神勇，又一次交出凌厲衝刺拚入三甲。到了上仗，紙上賽績走位6 6 3，實情出閘笨拙略失先機，更弊不久後受擠撞收慢，繼而並搶口，亦因此用了不少力氣之下，影響了末段衝刺力。「彩虹七色」三戰都上名，確認早熟貨色兼鬥心不俗，更重要近期出跳淡定，唔似之前生勾勾，愈來愈進步。

第十一場第三班1400米。「美麗星晨」來港前曾上陣一次，於左轉馬場膠沙地1400米，十四駒中得第一。來港後於三月尾開始操練，四至五月被送往從化馬場，期間由蔡明紹出試1000米草閘，八駒中得第六。回港後此馬試了泥閘兩次，分別九駒中得第一，以及八駒中得第二，足見上力程度，操足後於上月尾出爭同程1400，表現出色即拚獲亞軍，更吸引去到埋尾已腳仔軟外閃，然而一見馬追上即奮力再上前，展現極強鬥心。有了一次出賽經驗，今戰威力肯定更強更勁，睇埋周四試跑出腳整齊俐落，馬身更壯更實淨，追捧倍添信心。