香港文匯報訊 9歲陸海悠（Hazel）和21歲梁煒謙（Vince，暱稱表弟）兩位本年度最年輕唱作新星，先後推出首支派台歌《Cotton Candy Dreams》及《夜雪》後，宣傳活動停不了。他們更希望趁着暑假努力宣傳工作外，還希望多點服務社會，所以一直很希望做更多慈善演出和做校園騷，日前終於有機會了。

Hazel和Vince日前一同出席《樂力慈善音樂會2025 School Tour》，到位於觀塘的慕光英文書院禮堂演出，除了表演外，還有分享防騙經歷。當日Hazel打頭陣出場，先跟主持分享防騙經歷，「試過有人打電話問我攞個人資料，知道好危險，我當然冇畀啦！」之後Hazel又唱又跳一手創作曲詞的新歌《Cotton Candy Dreams》，面對着350名中三及中四年級的大哥哥，Hazel完全沒有怯場，反而以可愛演繹加上熟練表現，令全場師生起鬨。之後，Hazel再以K-pop舞蹈演繹韓國AI女團MAVE歌曲《PANDORA》，高水準演出技驚四座，令一班哥哥姐姐不禁歡呼讚好。

Vince緊接出場，講到防騙經歷提到試過搵暑期工時險受騙，「試過有次喺街申請暑期工，叫我留低咗個電話，點知之後一日收到幾百個詐騙訊息，雖然我冇覆，但都好睏擾。」到表演時間，Vince先演繹親自填詞的出道作《夜雪》，大唱冧歌即時令一眾師生聽得如痴如醉，氣氛相當好。為了配合當日活動防騙主題，Vince第二首專登揀選唱張天賦的《說謊者》，還落台跟一班學生互動，除了跟學生握手又擊掌外，還有女學生主動跟Vince畀心心，證明他唱情歌有一手，可以輕易俘虜到觀眾。最後，Vince和Hazel跟現場嘉賓一起，與學生們大玩估歌仔遊戲，令全場氣氛高漲。

希望有機會再演校園騷

Hazel和Vince都是首次參與校園騷，Hazel更是首次踏足中學，對她來說這次經歷相當新鮮，「第一次做School Tour，第一次行到入中學嘅禮堂覺得真係好大，我仲係返緊小學禮堂真係冇咁大。」能夠跟一班大哥哥大姐姐同場演出，以及玩遊戲令Hazel相當開心，而講到難忘事就要數到第一次被邀簽名，「好特別嘅體驗就係幫人簽名，竟然會有大哥哥大姐姐過嚟搵我簽名，真係勁開心，仲有個靚姐姐叫我簽喺佢個袋度，後尾佢仲follow咗我嘅ig，希望可以再參加多啲School Tour，真係好好玩。」

再踏入中學校園的Vince，見到學生的熱情，都感到相當興奮，「首次做School Tour，估唔到啲學生咁熱情，氣氛真係好好，呢次係我中學畢業後，第一次去到中學禮堂度做表演，有種返番中學時代感覺，自己好似做返中學生咁。」原來當日真的有同學覺得Vince似中學生，「好有趣，完騷後有個學生走埋嚟同我講，話我個樣好後生，如果我唔係着住其他衫，一定以為我都係中學生喎！」相對上次Busking車活動，Vince為這次校園騷揀歌刻意花過心思，「希望合符學生口味，香港學生讀書好辛苦，希望趁佢哋考完試畀啲歡笑同娛樂佢哋，見到大家玩得開心實在太好。」談到落台學生反應很好，Vince也開心能近距離接觸互動，「啲學生真係好熱情，好支持我哋演出，可能就嚟放暑假，冇咗平時上堂嗰種拘謹，可以同佢哋打成一片，係件好青春好幸福嘅事，如果將來有機會返自己母校做School Tour就好嘞！