丘嘉滎

今期係季內最後一期泥草混合賽，泥地賽事本來已經買少見少，當然要好好把握，第二場五班千二預計「五福星」為大熱門，不過馬匹相隔兩個幾月先再跑，五月尾又停過課，處女馬成為大熱值得挑戰。

「幸運傳承」好早已經喺四班顯露能力，不過馬匹韁口麻麻需要形勢之助，及後「幸運傳承」上千四曾經追入獎金名次，到回師谷草排內檔又成日困塞；每次「幸運傳承」賠率都不冷不熱，近仗唯一一次落到綠格開跑，就係用黃智弘跑泥地千二，早段留後，但入直路蝕到暈都交出亮眼追勢，證明馬匹泥地性能不俗，今次「幸運傳承」跑泥地賽前搵希威森試閘，騎師受傷即刻搵艾兆禮補上，兼彈多課草閘，加上檔位轉好，配合埋幾匹幸運系馬匹而來望變身！