香港文匯報訊（記者 阿祖）劇集《執法者們》中，無綫兩大小花何依婷及陳星妤不但鬥靚鬥青春、還同時大鬥舞技及纖腰；由於劇情講述星妤及依婷因為同樣熱愛跳舞結成好友、目標齊齊飛赴韓國成為女團，故二人在劇中有大量熱舞場口，其中一場群舞靈感更是來自After Class（姚焯菲、鍾柔美、詹天文）的《CYA》；二人除了不停擺動蛇腰外，又大擺「送心心」、「扮兔仔」等可愛甫，青春活力兼電力同告爆燈。而兩位小花雖已年屆3字頭，但逆齡演青春少女依然零違和。
另兩位小花還鬥飆演技，陳星妤抱着戲中爸爸徐榮爆喊自責的場口，與何依婷面臨被生劏割腎、嚇至花容失色場口均很大發揮。陳星妤之前在《一舞傾城》及《法證先鋒VI：倖存者的救贖》等劇集均有亮麗表現，這次再下一城挑戰喊功，驚恐情緒下淚流披面憶述與依婷在孤島上的不幸遭遇，更因連累了依婷滿心內疚全程顫抖崩潰，哭得鼻子及雙眼又腫又紅。
陳星妤表示拍跳舞場口，與依婷都希望能跳出女團感，故二人事前花了不少時間練習和上堂；而孤島部分則拍足一整天：「拍時大概在三月，夜晚仍然好凍，加上我哋着嘅衫比較短身，我記得拍夜晚氣氛跳舞場口時真係好凍，但都覺得值得嘅，最緊要出嚟效果觀眾鍾意。同埋劇入面咪話我扭親腳嘅，其實我現實入面都真係扭到隻腳，亦因為咁同依婷培養咗幾好嘅感情，之後我哋再合作又係跳舞，都係幾特別嘅緣份。」
至於依婷無論是被逼食抗排斥藥、或是面臨被割腎場口，均將絕望及極度驚慌感演繹得相當到位，加上面色慘白，令場口充滿張力。依婷笑言由於被綁架的地方環境惡劣，故絕有助她自己進入狀態：「自己拍嗰時真係覺得好逼真，因為個場景真係一個荒廢咗嘅地方，又黑又污糟，所以拍嗰陣都好代入到驚嘅感覺。」又笑言拍畢該場戲後，與星妤獲封「被綁孖寶」。
評論