無綫辯論形式綜藝節目《今晚乜都拗》，今晚（20日）一集評論題目分別為「單身好啲定結婚好啲」，支持結婚的藝人代表有蕭正楠、麥美恩、林秀怡，支持單身的藝人有曾展望、周奕瑋、潘盈慧。是集蕭正楠（阿蕭）求生欲大爆發，先後三次高調展示對老婆黃翠如的忠誠、真心及寵愛，當中又夾雜了某種無可奈何。

阿蕭在節目一開始即搞笑地唱好婚姻：「我答咗單身好，我返到屋企就唔輕鬆喇，就有好多嘢要跟尾，所以絕對係結婚好！」之後才回復正經話：「我覺得喺結婚嘅過程，令我最深刻係我覺得我比以前更加好……」當被追問婚後是否「無自由」，阿蕭先是發呆、繼而笑到唔識停，恍如被篤中死穴的他更有口難言噉款回應：「唔好講我呢個CASE先啦，我驚我講錯。」然後又是一本正經強調不會單獨跟女性出街食飯，阿蕭說：「唔係佢唔畀，而係我唔想！」

更爆笑的是，當近日被葉蒨文看中的曾展望（GM）直指「沒有另一半，問題少一半」：「女朋友要氹架嘛，一個月總有幾日情緒波動啲，我自己已經情緒壓力大，我再要承擔多一個人嘅情緒，就大件事。唔通你話聽日氹（番佢），咁你未必捱得到聽日。」

阿蕭聞言即搞笑窒爆GM：「如果你性格係咁，你嘅下場都好悲慘！你好多負面嘢講出嚟，你唔可以喺佢嚟M時特別溫柔架咩？」周奕瑋聞言搞笑反擊：「呢個世界唔係所有女人都係黃翠如嚟架嘛！」

節目另一笑點是麥美恩（Mayanne），在節目中呼冤「點解我仲未嫁」，又謂一個人供樓壓力爆煲時，周奕瑋竟一句踢爆其實Mayanne不知多享受單身：「你話你屋企啲酒，寧願自己一個人（飲）都唔想同人Share。你仲話我就係豪門，我使人幫我供樓？！」