梁振輝 香港資深出版人

「繳械」本指迫使敵人交出武器。香港人會叫丈夫把「金錢」（多指每月的薪金）全數上繳妻子做「繳械」。

翻查歷史，英王喬治五世的四子喬治王子在1934年與希臘的瑪麗娜公主結婚的數周前獲父親冊封為「根德公爵」，其妻名正言順的使用了「根德公爵夫人」頭銜。1952年10月26日至11月1日，「根德公爵夫人」訪港。行程中，公爵夫人訪問香港大學，其後校方准許創立一個以她名字命名的女生舍堂——根德公爵夫人堂。由於「跟得」與「根德」音同，香港人就打趣的叫那些無論丈夫在什麼場合都會「跟到實」，不會讓他與任何人尤其異性有獨立相處時間和空間的太太做「跟得夫人」了。

「海底撈針」指在大海中尋找一根針。比喻東西很難找到或事情很難做到。「海底針」指大海中的一根針；海底是那麼的深，「海底針」比喻難以觸摸。「女人心海底針」形容女人心思善變，想法像海底針一樣，令人難以捉摸，多含貶義。

心臟藏於體內，亦即隔了一層肚皮；心代表某人的心思，隔着肚皮便不能看到其心思了。「人心隔肚皮」指難以揣測別人的心思，有人心難測的意思，也作「隔重肚皮隔重山」「隔層肚皮隔層山」。

示例：

阿仔，你話同個舊同學夾份搞生意，你好似見返佢冇耐，呢十幾年變化好大㗎！

阿媽，「人心隔肚皮」，我已經做足功課，搵人起咗佢個底先話合作，你估我懵嘅咩？

常言道，人是感情動物，有血有肉的，是故人的行為受感情所驅使。中國人有以下一句諺語：

人心是肉做的/人心肉做（粵語）

比喻人有感情或者同情心。以下是一個與「人心肉做」相關的個案：

有日行山，行下行下好似聽到有人嗌救命；周圍望下，原來係對落五十米左右山崖下面傳上嚟嘅！人命攸關，顧唔得咁多喇，我慢慢擒落去睇下發生乜事；落到去見到個大叔頭破血流，睇真啲原來係四十年前撬咗我初戀嗰條友。雖然呢啲都係陳年往事，但係響呢幾十年我偶然諗返起都對佢恨之入骨，仲有個心都會隱隱作痛，要我出手救仇人，咪玩喇！喺呢一刻我真係想掉頭走。唉，畢竟「人心肉做」，點會見死不救，於是即刻call 999，救援冇幾耐就到……佢臨行前不停咁多謝我，但係認唔到我。雖然我冇同佢相認，但係多年來嘅心結終於響呢單救人事件之後解開。嗰時我深深體會到：

呢個世界雖然冇永遠嘅朋友

但亦都冇永遠嘅敵人