香港文匯報訊(記者 子棠)蔡卓妍(阿Sa)和鍾欣潼(阿嬌)昨晚舉行的第11場《TWINS SPIRIT 2024 紅館演唱會》是歌迷專場，兩人特別為歌迷安歌多5首歌，又選唱了為歌迷而寫的新歌《忠粉》，唱時更因為歌迷的熱情讓她們未唱先落淚。

阿Sa表示，「今晚係fans場!真係未開騷係樓下已聽你哋嗌聲，太犀利啦!一個組合走過22年並不容易，最感謝歌迷一直無分好壞日子都陪伴到底，讓我哋可以走下去，今晚我想唱新歌《忠粉》，呢首歌係送畀所有歌迷……哎也……未唱已經想喊……。」兩人淚流滿面唱完這首新歌後，即要拿紙巾不停抹淚，更不約而同說:「太感動啦!真係要平靜下先……!」歌迷立即安慰兩人狂叫唔好喊。

豈料未幾她們平靜完後隨即變回平日瘋癲模樣，阿Sa笑謂，「我哋不嬲係咁，想唔想像到呢22年，我哋都係咁?哈哈。」此時，台下有歌迷狂叫「嘴佢」;阿Sa說，「你哋真係吖，有咩咁特別?又唔係未見過?成日都做㗎啦!」敵不過現場萬人大叫「嘴」，兩人搞笑的跳出像打功夫一樣舞步後，阿Sa就拉阿嬌過來嘴，但第一下竟然失手相撞，笑爆全場;第二次則完美嘴得成功，歌迷叫聲更嗌裂紅館;阿嬌笑道，「真係無聊呀你哋!見係fans場滿足下你哋啦。」安歌期間，阿嬌為當晚觀眾評分500分，阿Sa更豪氣稱唔想走，要安歌到凌晨三時;最後兩人加唱了5首歌曲送給歌迷。而這晚的捧場客有何超雲、何超蓮及張達明。

責任編輯： 之袁