梁振輝 香港資深出版人

以下是一些內地人、澳門人和香港人各自表述對「廣東話」叫法的取向：

我係「廣州人」，我講「廣州話」，以前會話講「廣府話」。

我係「廣西人」，係講「廣東話」，唔係講「廣西話」。

我係「澳門人」，我講嘅係「廣東話」，跟香港人講嘛！

我喺「廣州」出世，落咗嚟香港幾十年，喺呢度個個都話自己講「廣東話」，如果你話自己講「廣州話」，啲人就會用奇異眼光望實你。

我係湖南人，落去廣東省打咗好幾年工，所以都學到多少「白話」。

我係香港人，我講嘅係「廣東話」或者「粵語」。

我哋呢班喺香港出世嘅後生仔講嘅係「香港話」或者「港語」。

我係廣東人，落去香港血拚，佢哋講嘅「廣東話」同我哋講嗰啲有啲出入嘅？

筆者（梁）在一次與友人（PW）的談話中講述了一些與「廣東話」叫法相關的話題：

PW：阿梁，人哋話廣東省好大，有幾大呀？

梁：廣東省係中國最南嘅一個省。東面去到福建，西面去到廣西，北面去到湖南、江西㗎！

PW：「廣東話」個名聽落有啲混淆，好似話係指響廣東省嘅人講嘅話。冇錯廣東、廣西都係講「廣東話」，但係福建係講「閩南話」呢；咁「廣東話」係指響廣東嘅人講嘅話。話時話，廣東分咗好多地區，有廣州、中山、石岐、三水、順德……仲有潮州。除咗廣州，個個地區都有地方口音，同我哋講開嘅「廣東話」係有出入，潮州話就直頭唔同喇。咁講「廣東話」應該係指廣州人講嘅話。

梁：醒！舊時廣州關西係有錢人嘅聚居地，文化水平相對比其他地區高；整下整下，啲人就當咗響呢個地區所講嘅「廣東話」係正宗、正統，所以「廣東話」又可以叫「廣州話」。

PW：咁睇叫「廣州話」好似最合適喎。

梁：所以以後聽到啲老廣講話自己講「廣州話」你唔好覺得礙耳。內地啲廣東人多數會話自己講嘅係「廣州話」;冇嘅，多一分自豪感啫。「廣府」指廣州一帶，所以舊時都有人叫「廣州話」做「廣府話」。

PW：以前讀書作文嗰陣，我喺篇文度提到「廣東話」，老師同我講話寫「粵語」好啲，係因為「廣東話」嘅書面語係「粵語」。

梁：其實兩個都得，寫做「越語」都得。廣東，《呂氏春秋》叫「百越」，《史記》叫「南越」，《漢書》叫「南粵」，「越」同「粵」通，一般可以簡稱做「粵」。

PW：上世紀八十年代中期中國改革開放，好多外省人落嚟廣州同深圳度打工，嗰時啲酒樓食肆嘅服務員好多都係外省人，你同佢哋講「廣東話」，佢哋就會唔鹹唔淡咁同你講：「唔識講『白話』！」原來佢哋將「廣東話」講做「白話」，好似怪怪哋！

梁：「白話/白話文」原本指唐宋以嚟好接近口語嘅一種書面語，後嚟指現代漢語嘅書面語言，相對於文言文嚟講嘅。應該係廣東話主要係口語，所以外省人叫「粵語/廣東話」做「白話」。

PW：咦，聽人講有句「空口講白話」，意思係咪「空口講廣東話」呀？

梁：呢度嘅「白話」唔係指「白話文」嗰隻「白話」，都唔係指「廣東話」嗰隻「白話」，係指空話；白者空也，空即係冇料到，冇根據嘅話，齋講冇實際行動嘅意思。

PW：咁即係「得個講字」、「講咗即係冇講」，「齋噏」喇！

梁：係。

PW：講開又講，點解啲人會將「齋噏」講咗做「狗噏」，聽落好似粗口咁喎！

梁：「齋噏」講下講下就講咗做「豬噏」；啲人講嚫豬都會聯想到狗，好似豬朋狗友、豬狗不如、阿豬阿狗，咪將「豬噏」改咗做「狗噏」囉。

PW：唔止呀，仲有人叫「狗噏友」做「大隻廣」，咁又點解叫做「阿廣」呀？

梁：「廣」同「講嘢」嘅「講」個音好接近，好多人仲以為一樣，所以「大隻廣」就即係「大隻講」，講到好大但冇實際行動囉。

PW：近呢十零年，香港啲後生仔唔會話自己講「廣東話」，係會話自己講「香港話」，留尾仲有人正其名做「港語」，我覺得我哋香港人話講「香港話」都好恰當吖。

梁：可以咁講，主張同認同呢個講法嘅人大部分同身份認同有關。從命名嘅含意，將我哋平時講嘅話叫做「香港話」，就係話畀全世界嘅人聽香港人有自己嘅語言，其實係冇嘅！

PW：咩冇呀，又中又英，又有多少自己嘅獨特詞匯，仲周不時夾雜埋啲懶音同粗口，正所謂自成一格，佢哋呢個講法又好似有啲道理喎！

梁：無論你加咗乜嘢上去，好嘅衰嘅都係走唔出「廣東話」呢個框㗎！

PW：內地人話佢哋講嘅「廣東話」同我哋講嗰啲有啲出入。舉個例，佢哋會叫「譚仔米線」做「談」仔米線，我哋就叫「淡（談4-5）」仔米線。

梁：「廣東話」叫姓氏嗰陣一般都會變調，陳仔讀做「診」仔、黃Sir讀做「黃3-2」Sir、大梁讀做大「兩」，所以只係發音習慣唔同啫。仲有我哋香港人好多時都係講懶音，人哋冇講咪覺得同你唔同囉！

PW：而家啲人大部分分唔出邊啲係正音邊啲係懶音，啲中文老師冇矯正佢哋嘅咩？

梁：我識得好多老師自己講咗懶音自己都唔知㗎！

PW：原來又係社會嘅錯，哈哈……講咗咁耐，「廣東話」點叫法至恰當呀？

梁：香港人叫「廣東話」或者「粵語」；內地人叫「廣州話」或者「白話」都冇問題。