梁振輝 香港資深出版人

2022年4月27號，資深藝人曾江離世，佢其中一單最為人樂道嘅嘢係佢晚年嗰陣對「死」嗰番獨特見解——至緊要「好死」，今日就同大家分享一下：

我唔知道我同老伴邊個走先，但心理上有呢個準備；冇關係，大家講清楚走咗之後點樣，因為一定要經過，冇得走，亦都走唔甩。我知道呢一日會嚟，所以我唔怕，我至怕係病得好耐，佢好慘，我都好慘，快快趣趣收工冇問題，如果一病就十年八年，佢點搞呀？

要你病五年，你又辛苦，屋企又辛苦，銀紙又辛苦，乜嘢都辛苦；如果你病兩個禮拜瓜咗，多謝、多謝、多謝多謝多謝！一日，更加好！

死，每個人都會經過；最緊要我哋老人，應該最希望，可以做到嘅就係，死得舒服啲…係咪？幾過癮吖，希望「好死」呀，真係㗎，唔係講假㗎！

「好死」一詞雖然有個死字，但絕對唔係一個惡毒嘅咒語。能享天年、死得安詳嘅所謂「善終」，中國人認為係莫大福氣。呢種「美滿/美好」嘅結局就係叫「好死」。

究竟可唔可以「好死」，中國人一般相信呢啲係要修返嚟嘅，如果一生無惡不作，咁就多數「冇得好死」（不得好死），唔通：

眾善奉行必好死，多行不義無葬地

有一種死叫做「惡死」，有兩個意思。「死」帶極嘅意味，所以「惡死」其中一個意思係極其兇惡，多數形容人好難相與，喐啲就鬧人鬧到癲，真係係人都怕咗佢。咁睇，「惡」可以引申到有難嘅意思，所以「惡死」另一個意思就係難於死去，意味着求生不得、求死不能，死極都死唔去，咁即係長時期留喺世上受苦。如果話某人「惡死」，除咗話佢好惡之外，仲有多少咒詛。

舊時啲老人家，如果晚景淒涼，除咗自怨自艾一番，都會話「臨老唔過得世」或者「臨老過唔得世」，意思就係老咗嗰陣唔能夠好好咁度過餘生——正常咁生活落去，唔係生活拮据就係百病纏身。有人都會用呢句嘢嚟咒人。

「養兒防老、積穀防饑」係中國傳統觀念，但係呢種諗法已經過時。現今世代，仔女大咗尤其已經有咗自己嘅家庭，對父母多數疏於照顧甚至冇理。如果做父母嘅有上面嘅諗法，落空機會就好大，所以好多父母早早開始為將來打算；正所謂「親生仔不如近身錢」，就係唔想搞到「臨老過唔得世」，即係「衰收尾」。

有體弱多病嘅老人家或者長期病患者因為唔想「累人累物」——拖累屋企人、虛耗社會醫療資源，多數會咁講：

唔好留響度「獻世」

有苟延殘喘、活受罪嘅意味。又或者有啲人因為種種原因而極度不受歡迎，有人都會咁樣話呢等人。

「獻世」唔係對世界有貢獻咩，點解會有貶義㗎？原來「獻」嘅本字係「牽」，「牽累」個「牽」，又世界包括「人」同「物」，咁「獻世」即係話「累人累物」喇！