梁振輝 香港資深出版人

曾江在2015年憑電影《竊聽風雲3》，榮獲香港電影金像獎最佳男配角。領獎後，曾江接受傳媒訪問時補充說：

如果早啲攞呢個最佳男配角獎，可能有意義啲。理由係有獎攞就係一種肯定同鼓勵，有可能將演技提升到另一個層次。

唔係劇本好就一定拍得好，劇本唔好就一定拍得唔好，所以我唔係好揀劇本嘅。 

 

主角做過，配角又做過。好高興可以喺銀幕上咁短時間，就令觀眾有感覺。呢個唔係個人獎項，需要靠劇本、導演、工作夥伴一齊努力同埋分享，其實做男配角唔易，因為冇主角出場咁多，觀眾睇到佢嘅機會亦都唔多，所以演起嚟就更加困難。

 

我唔應該憑自己嘅經驗去要求人哋，我應該憑自己嘅經驗去要求自己。

 

以前我成日會要求人哋，而家我反而想要求自己點樣去配合佢哋。

 

我之前成日講：好為人師，我而家先知道係指人之患；俗啲講就係衰喺成日鍾意教人，而家我唔會喇。

 

你覺得應該咁樣做，就去做。當然，好多時你未考慮清楚就做咗，但冇需要覺得遺憾。

 

我唔識得推銷自己， 我亦唔想sell自己；我唔想自己欣賞自己，我想人哋欣賞我。

 

好多人話唔容易同我合作，我冇所謂。我唔識做人，好易得罪人，因為我鍾意講真話，講假話冇意思，假嘅要諗，真嘅唔使諗。

 

我得罪過好多人，因為我講嘢好直，但我絕對冇惡意，我唔會害人。老實講，如果我有害人，仲可以活到今日咩？我從來冇諗過去害人，所以我好容易瞓得着。

 

錢賺到呀，但冇得玩，有咩癮？呢啲又話唔食得，嗰啲又話唔食得，咁做人有咩意思，做人最緊要開心、過癮。

 

兩公婆相處點可能冇拗撬？夫妻相處之道好簡單，就係嗌完交當冇嗌過。仲有，老婆永遠是對的，我永遠認低威。

 

對人生嘅態度，我唔係81歲，只係50幾歲，我仍然歡迎挑戰。我唔怕打仗，以前打仗好開心，而家係辛苦嘅，但我仲想打落去。

從影70年，今年2021年我仲拍緊廣告同電影（註：去年語），原因只得兩個，一來回饋香港電影、幫助新導演。而家香港喺呢個咁艱難嘅時期，我可以say no咩？我應該say no咩？我say no都唔好意思喇！二來，去到我咁嘅年紀，好多時候啲角色已經typecast（定型）咗，唔係做大有錢佬就係黑幫大佬；冇問題，問題係我演唔演到唔一樣嘅老闆同黑幫大佬啫！

 

87歲，仲想點啫？如果人生可以再嚟多次，我希望可以更豐富。而家我仲未滿足，仍然想搵啲更好玩嘅嘢，當然要體力得，健康得先得…

上個月啱啱過咗87歲生日，除咗聽嘢唔好，比較麻煩係有痛風，出入都要帶住支枴杖。以我自己嚟講，年紀只係一個數目，當然要有相當嘅精力同體力，先至可以做到好多嘢！

我後生嗰陣玩好多運動，好似打網球。我參加過香港聯賽，由D級打起，最後升到上A級。我覺得自己嘅水準只係B頭A尾，可以升上A級，但下一年又跌返落B級，保持唔到；喺B級有得贏，A級冇得贏，好多方面都係咁樣。在我嚟講，做戲、畫畫、寫字、煮嘢食、打波、旅行等等，全部都係只求好玩。

 

只要我仲未死，就唔會放棄拍戲，自己嘅人生字典裏從來冇過退休呢個詞。

 

我一世人可以當得人哋兩世，咩場面冇見過；老婆都有三個，仲有一仔一女，仲有狗孫仔、貓孫女㖭。 

 

我活到而家，見到嘅世界都係人哋同我安排嘅，我而家希望自己一個人去搵我可以接觸到嘅世界。