梁振輝 香港資深出版人

粵語片時代的玉面小生曾江，步入不惑之年至87歲壽終前，演盡熒幕角色，風靡萬千觀眾。其中一項為人樂道的是，曾江本人熱情健談，因此歷來不少國內外媒體都喜歡找他做專訪，就此留下蘊含着不少人生哲理的名言金句。在不偏離曾江的思維理念下，筆者對相關內容作出適當修飾，且整合成純廣東話版，以供大家欣賞：

曾江於2015年憑電影《竊聽風雲3》，榮獲香港電影金像獎最佳男配角，有感發言如下：

無論係台前幕後工作夥伴，我多謝佢哋，更加多謝支持我咁多年嘅觀眾；最緊要係要多謝「佢」，多謝「佢」畀我健康，冇健康我又點可以工作呢？希望「佢」繼續支持我同畀我健康。

明顯地，他所指的「佢」在各人心中各有定義，泛指神靈。

教一條老狗學佢冇接觸過嘅嘢，點會唔難呢？

一個人成世可以做自己最鍾意做嘅嘢係好幸福嘅。

而家拍戲，我唔求錢、唔求名，我唔求排名、唔求戲份多。我求咩？我求開心。

我唔追求做主角或者戲份多。總之有得做就唔好畀佢停，我唔需要退休。

我覺得冇嘢係可以完全滿意嘅，因為如果你覺得滿意，咁你已經係唔想再進步嘞。

我嘅競爭對手就係自己，我只係自我追求啫。

合作，我覺得係要同導演擦出一啲嘢嚟，咁先至係合作。導演叫你笑，你就笑。咁係合作咩？咁係奴隸，咁係奴才，冇咩意思。

而家啲導演太後生嘞，人生同生活嘅經驗都缺乏，好多嘢都係憑想像，拍出嚟嘅電影咪唔會有感情囉。

老實講，對而家呢個世界我唔係好認識。我冇辦法接觸小朋友，我坐近佢哋，佢哋抗拒我，我都抗拒佢哋。我冇咩好同佢哋傾，佢哋講嗰啲我又唔識。我唔係話佢哋冇文化，係佢有佢哋嘅文化，但佢哋嘅文化我真係唔認識。

某啲演員係好有天分，我覺得自己唔係咁有，所以我會好努力。雖然天分我得嗰20分，但我會用60分嘅努力，加埋就有80分喇。有啲演員一行出嚟就已經有60分嘅天分，再落少少工夫，佢就已經有90分嘞。

一部戲成120分鐘，我只要出現一分半分鐘就夠嘞。30秒鐘要畀觀眾留低120分鐘嘅印象，咁先至係最難嘅。

同內地一啲資深演員嚟比，我差得遠嘞。唔係我冇自信，而係人要自知，要知道自己嘅輕重。

做architect要識design，但更重要係識得market自己。世界上成功嘅architect未必係最好嘅designer，但通常都係好叻嘅salesman。我唔會亦唔想sell自己，所以我知道我唔會係一個好叻嘅architect。

喺美國讀書嗰幾年，一啲都冇嘥！人哋唔係教你spelling ，係教你thinking；你學識分析，知道咩係適合自己，跟住就識得點去選擇。

我呢生人，生活都係好豐富嘅，唔喺物質上，而係我喺求知欲上。我想知道嘅嘢太多，所以我追求，咁樣我會好開心。

喺呢個世界上，你要知道嘅嘢太多，你只要想知道，係唔會少。只要你有呢個願望，你嘅時間永遠好充實；咁係求知，唔係求財或者求其他。

「欲」點可以冇，一定要去搵，冇「欲」人生就冇意義！我有「欲」，不過係「求知欲」；其他「欲」？唔係冇，而係做唔到！

我唔算有天分，但係我好努力去研究！

我真係嗰種每日都唔一樣嘅人；我每一樣嘢都要做到自己滿意，搵到自己嘅風格。

我真係咩都識，但全部都係B，冇樣係A。我唔使做專家，但識得揀自己鍾意嘅口味就夠喇！我咩都要識下，但又唔需要好深入研究。好多人一生得一樣叻，其餘咩都唔識，有鬼用？

香港人生活都比較平靜、變化唔多，所以想像力亦都比較少；冇嘅，佢哋好多嘢都冇經歷過。

香港嘅演員，冇一個professional，成班柴娃娃，淨係掛住玩，從來冇諗點去改進自己。