成日話要「齊上齊落」嘅攬炒分子又走咗一個。前「香港眾志」副主席鄭家朗前晚喺Facebook發文，話自己已經身處英國。明明「過咗海就係神仙」，但鄭家朗都仲要賣慘，話「此刻無法身在香港與大家共同對抗，我感到十分沮喪」喎，應該點都沮喪唔過仲喺監獄嘅其他前黨友啩？
鄭家朗去到外國，香港少個攪屎棍，外國得到咩呢？就係一個「教育家」嘞。鄭家朗話自己去到外國，一直諗緊自己可以點「貢獻」，所以過去一年就到唔同學校「講課」喎，所以舊年年中開始，佢就聯同過去於「倡議教育政策」時識嘅人組成團隊，為海外香港人「度身訂做教材」。
佢咁嘅學歷，又教到啲咩呢？原來就係搞咗套故事書加3套桌遊喎，仲揚言「每一個堅持真相的家長與小孩，希望大家能夠支持這套教材」，睇嚟都係旨在荼毒細路，外國嘅港人家長真係要自己睇路嘞。
咁香港人點睇呢單嘢呢？可能會令佢更沮喪。好似網民「徐黃叢」就反問︰「乜水？已經唔記得佢。」「Pig Pig Small」亦話︰「點都好，走咗去就唔好返來。」◆香港文匯報記者 甘瑜
評論