自從香港國安法於去年6月底起實施後，好多反中亂港分子明明畏罪潛逃，仲講到自己好似為咗香港「忍辱負重」，出去為香港爭取權益云云。其中「最短命議員」梁頌恆搞搞所謂「國際線」，突然噚日喺Patreon出post教人炒股搵錢，同為「短命議員」嘅羅冠聰早前亦美其名話展開所謂「國際游說」，但實際就開開心心同其他潛逃罪犯「把酒言歡」。有網民就喺「連登」討論佢哋𠵱家嘅處境點解咁唔同，但唔少人都覺得佢哋本質都差唔多，不嬲都唔識政治，淨係識呃呃騙騙，𠵱家都係做返老本行啫。
梁頌恆噚日喺Patreon出post，大談港股美股。香港文匯報記者睇返佢個Patreon頁面，原來都係要「課金」先會有更多內容，收費由4.99美元（約38港元）到49.99美元（約388港元）不等，仲話會睇到「描寫牢獄中生活的作品」以及「不定時的波馬股票金融政治分析」云云，可謂為咗吸金無所不用其極。
網民「真天真」就道破天機：「識炒股仲洗（使）乜開網絡乞衣（兒）兜？」有連登仔更揶揄：「大家記得多多捐錢。」
敖卓軒、羅冠聰呢班潛逃反中亂港分子，相比之下就似乎唔使太憂慮「生活費」喇。佢哋喺外國散播反中亂港言論期間，都不時同其他潛逃「犯友」「把酒言歡」，放埋聚會圖上網，個個笑容滿面。「阿中小哥哥嚒嚒噠」就寸道：「仲國際遊（游）說？人唔笑狗都吠啦！」
針對佢哋咁精彩嘅「國際遊（游）說生活」，唔少「連登仔」好似早就預測到咁。
「飛鴿全輸」就話：「梁頌恆讀嘅係e commerce（工商管理），同政治學根本沾不上邊。佢連最基本嘅社會學都唔了解，點學人從政？」
譏羅冠聰「做返老本行啫」
「賈雨村」就話「羅冠聰出身都lu咋」，「羅冠聰唔係讀cultural studies（文化研究）咩？」暗指佢都根本唔識政治。
「絲家重地」就道破天機：「佢地（哋）不嬲都係呃呃騙騙架（㗎）啦，做返老本行之嘛。」 ●香港文匯報記者 藍松山
評論