今時今日嘅反中亂港分子越嚟越冇聲氣，有黃媒日前就少林功夫加唱歌跳舞咁炒埋一碟，搵咗個前《蘋果日報》記者、有暴動罪案件喺身、受助於「612人道支援基金」嘅人做訪問，但結果引唔到幾多同情，反而係咁俾人質疑。有人話個化名「阿日」嘅受訪者2019年尾先做記者，質疑佢暴動罪同記者身份有咩關係，亦都有人揶揄「612基金」根本幫唔到「手足」，只係幫到班煽人上街送頭嘅律師賺錢，另有人眼紅個「阿日」可以靠出租單位賺錢，仲有乜好講。越講越揭家醜，何苦呢？

《獨立媒體》日前報道，今年24歲嘅「阿日」，原本係《蘋果日報》記者。佢喺2019年年尾入職，上司本身應承畀佢喺審訊期間放無薪假，完咗再重返崗位，點知佢連裁決日子都未確定，《蘋果》已經執咗笠，搞到佢失業。報道又話佢現時靠打散工維生，包括幫親戚睇舖、做婚禮攝影師、出租單位等，收入比過去減少一半喎。

報道仲話，「阿日」本身有受助於「612基金」，但因為「612基金」停運，如果被判罪成，要上訴就要重新申請法援打官司，申請唔到嘅話上訴費用可達百萬元，難以負擔，可能會放棄上訴喎。

出租單位「維生」 網民睇到眼凸

篇嘢出街後，好多黃絲就習慣性予以同情，覺得佢好慘，仲想幫佢眾籌，兼同情埋「612基金」。不過，有心水清嘅網民就提出質疑，例如「連登」網民「Djilobodji」同「台北教父」就點出「阿日」有「出租單位」維生，對此睇到眼都凸；「魚翅航空無女」亦強調「她在2019年年末入職」，質疑佢暴動罪係早前犯落，唔應該撈埋一齊講；「1011010001」亦對「阿日」以「盡量減少外出吃飯」嚟慳錢表示無眼睇︰「無錢（就）仲出，又有肺炎。」

講多兩講，黃絲仲內訌埋，例如有人圖文並茂咁話《蘋果》曾經公開「手足」資料，唔抵可憐，亦都有人話「612基金」幫唔到人，例如網民「炸炸帝」話：「又話義務律師？收錢㗎？又話齊上齊落？收錢㗎？又話兄弟爬山？兄弟收錢㗎？又話核爆唔割？收錢㗎？而（）家知點解當初不斷水人上街送頭啦，大生意嚟㗎。」「Ming Mok」認為：「如果『612基金』捐款來源光明正大，只要如實報上國安處，根本不須要解散。」「Kate Chan」質疑：「真記者點會搞暴動呀？」「你認真就輸了」亦揶揄：「『手足』已有暴動覺悟，預左（咗）變CONDOM（棄卒），唔洗（使）咁驚訝。」 ●香港文匯報記者　鄭治祖