黃店為食「人血饅頭」見利忘義，越出名就食水越深。好似日前就有「手足」喺facebook黃谷圖文並茂咁話對知名黃店「光榮冰室」失望：「西多份（分）量係四分一，魚柳係斬件式，凍檸茶來到，d（啲）冰已幾乎溶（融）晒。」唔少網民睇完相都話大開眼界，佩服「光榮」嘅出品可以咁鬼細份。有網民就笑言：「五餅二魚嘅飲食概念！」
斬件上魚柳 「一口式」西多
網民「Alan King」日前喺fb黃谷「香港黃店關注組」發帖，話自己去咗「光榮」食下午茶，點知個餐嚟到以為自己叫咗個兒童餐，仲上載咗張見到個餐縮晒水嘅相咁話：「西多份（分）量係四分一，魚柳係斬件式，凍檸茶來到，d（啲）冰已幾乎溶晒。」
帖文一出，隨即引嚟唔少網民留言鬧爆，覺得不如改名叫個餐做「一口西多士」。有網民就唔明點解「光榮」要咁對「手足」。「Yee So」問：「點解『光榮』個廚房可以日日都有新既（嘅）『杰（傑）作』出品既（嘅）。」「Si Ca」就問：「我想知個西多係咩事，要特登切細塊面（麵）包黎（嚟）炸架（㗎）喎。」「Chan Cheuk Kan」就估：「睇怕廚房的人不是師父級，可能請啲『二打六』學徒扮師父。」
黃絲照盲撐 店主認低威
不過，有黃絲則依然護短，想夾硬搵藉口幫「光榮」開脫。「Angel Yeung」稱：「但係細食嘅我呢個份（分）量又真係『啱啱好』喎，我不嬲嗌開凍檸茶都係要少冰少甜，所以對我來講真係『Perfect（完美）』。」「Steve Kam」就話：「溶晒咪叫佢俾（畀）返幾粒冰囉！咁大個人，唔洗（使）教嘛。」
之但係，今次件事真係肉酸到唔係盲撐黃絲可以救得返。「光榮飲食」fb專頁噚日出post回應事件，都只好話︰「係自己問題唔洗（使）狡辯，光榮份（分）量一定要大！」
不過，個post好快變埋中伏留言區。網民「Vivian Li」貼埋圖話︰「上次係（喺）銅鑼灣果（嗰）間，啲飯硬到匙羹都斷，再比（畀）多次機會食雞扒蛋飯，塊雞扒係縮左（咗）（係縮味），要改善下（吓）。」「Niks On」質問︰「幾時會叫伙（夥）計衞生d（啲），唔好用手指公插住d（啲）飯扲（拎）比（畀）客食？」
「Jacky Chan」亦話︰「上次喺tst（尖沙咀）叫個咖哩（喱）牛腩飯比以前少咗三分一。」「光榮飲食」一度質疑個網民問︰「牛腩都有一段時間冇出，你上次係幾時先？」點知網民真係摷返證據話︰「睇番（返）日期係8月30日。」「光榮飲食」只好扮冇嘢話︰「黎（嚟）緊將會出返，一定唔會再有咁既（嘅）問題！」
「Kelvin Ng」就認為黃絲唔應該再盲撐：「當你去一間食店食啲咁嘅野（嘢），間中一次你都未必會接受，唔係黃就大晒，可以妄（罔）顧客人感受！」
其實面對難食黃店，大家用腳投票咪得囉。●香港文匯報記者 黃書蘭
評論