正所謂走得快好世界，一班攬炒派區議員聽聞將要開始宣誓嘅風聲就雞咁腳辭職，所謂嘅「無畏無懼」、服務市民都變成一堆廢話。單喺噚日，就已經有成最少7名攬炒派區議員辭職，並用盡所有藉口嚟掩飾佢哋嘅心虛，包括乜嘢「敗給了恐懼」、「區議會受到政府多方面阻礙」、「考慮了個人、服務處職員及家庭的安全和整體局勢」云云。不過，市民一早就睇穿佢哋嘅把戲，譏諷佢哋「原來無畏無懼，只係口號」，並認為雨過天晴，「小丑戲終於落幕了。」
西貢區方面，何偉航同陳嘉琳噚日都宣布辭職。何偉航稱「面對日益下況的政治環境，疫情下不斷收窄公民權利，種種變化都令人十分鬱悶及嘆息，空間已經寥寥無幾。」而之前一直都拒絕辭職嘅陳嘉琳就直接一啲，稱自己「敗給了恐懼」，同時又話冇咗公帑支持嘅議辦將會轉型繼續「支援牆內『手足』、支持地區黃色經濟圈」云云。
不過，網民就笑佢老作。「Bas Siu」問：「敗給恐懼？就割，難為年輕『手足』坐監、逃亡、失業……，根本就係怕坐監。」「Lee Ken」譏諷：「原來無畏無懼，只係口號。」結果陳嘉琳回應指「同學如果你有留心，其實我係淆底獸，成日乜都驚。」果然喺自身利益面前，乜嘢「理念」都係假。
東區古桂耀就稱「今屆區議會受到政府多方面阻礙！開會不派部門代表出席……同時近日政治氣氛變成很差」，所以決定辭職喎。
觀塘區龔振祺只係道歉，然後表示辭任後會回到以前嘅專業繼續發展，相信區政服務將暫時畫上句號，直到適當時候，又稱「相信我們之後『換個時代再一起』」，將心虛同反悔呢兩個詞表露無遺。
沙田區嘅許銳宇就話自己已於7月9日卸任議席，並誇張到稱「辭職，就像自我了結，親手將這部份（分）生命埋葬」，即係話佢寧願死都要辭職啦。
巫堃泰晒「文青句」煽情卸膊
屯門區巫堃泰換一種風格，稱「在這個美麗新香港，究竟還能不能容得下我這種議政風格的區議員？」結論係「思索良久，考慮了個人、服務處職員及家庭的安全和整體局勢，實在沒有辦法在安全的情況下，繼續服務」，所以服務處亦即時暫停對外開放。
就算佢哋嘅語言偽術有幾「感人」，市民都一早睇穿佢哋嘅把戲。「Eddie Chung」話：「呢次醒呀，個個自知身有屎。」「Joe Wong」認為佢哋：「死雞撑（飯蓋）」。「Fun Fun Lok」表示今時今日呢種服務態度係唔得㗎：「打工心態的區議員，已完！」
其實，成件事就好似網民「Frankly Lai」話齋：「小丑戲終於落幕了。」●香港文匯報記者 鄭治祖
評論