《立場新聞》可能9個月至12個月後就玩完，預先同員工找數、又下架文章、又董事辭職，網民點消化件事？有攬炒派網民就直言，《立場》咁做係「減少被捕人數」，亦有人揶揄《立場》母公司嘅董事蔡東豪係繼2014年執咗《主場新聞》後，再一次籌備「遠足」喎。

《立場》噚晚喺fb出嘅公告講到咁，唔少網民直接當咗佢哋要執笠，紛紛「多謝立場手足」「尊重立場決定」，有網民就澄清佢哋只係做兩手準備，仲未要執，最起碼喺9個月至12個月使晒啲錢之前唔執。

網民「Sau Saam」話︰「減少被捕人數，明白。」似乎一下認定《立場》一大班嫌疑犯咁。「Fung M Chi」就話︰「我最感謝你地（哋）既（嘅）係終止員工合約同先作賠償。呢點係對工作同事負責任既（嘅）表現。」真係反手又摑叫員工即走冇賠償嘅壹傳媒一巴。

雖然唔少攬炒派網民支持《立場》舉動，但亦有攬炒派認為事件似曾相識，事關蔡東豪2014年曾經因為「恐懼」而執咗《主場新聞》，違法「佔中」時亦反口唔做「死士」反而講行山，於是就出現咗潮語「我恐懼、我誤判、我行山」，網民「人在倫敦總依戀雨點那麼不如不見」就揶揄︰「唔講以為蔡東豪仲行緊山。」「Leung Andy」亦附和︰「準備搞第二次遠足。」●香港文匯報記者　甘瑜