《蘋果日報》停刊唔夠12個鐘，已經有黃絲趕住發「爛果財」。正當唔少黃絲噚日喺社交平台「哀悼」已停刊嘅《蘋果》時，一直自稱係「記者」嘅曹敏儀突然喺facebook開咗個叫「蘋果日報live」嘅專頁，稱自己去咗《蘋果》做義工，以後仲會喺呢個專頁直播咁話。由於呢個專頁嘅logo同《蘋果》以往個logo一樣，所以都呃咗唔少黃絲like，不過好快就俾其他網民踢爆呢個專頁並非由真正嘅《蘋果》記者營運，只係曹敏儀自己諗住呃「光環」，搞到呢個專頁開咗唔夠24個鐘就俾人投訴到關閉。
自稱網媒「記者」有前科
黃媒「和你報」噚日亦喺fb報道有關事件，話正當唔少人因為《蘋果》停刊而悲痛嗰陣，竟然有人用《蘋果》個名同logo重開專頁，而「連登仔」亦迅速踢爆，曹敏儀就係前年黑暴嗰陣起已經自稱係網媒「香港人連儂牆」嘅「記者」，仲批評佢「搞到記者個名臭晒」，開post嘅「連登仔」「我叫走甜」仲話：「呢D（啲）垃圾網媒淨係識賣黃，呃錢呃眾籌呃課金。」
唔少黃絲網民都話冇眼睇，「Tommy Choi」好無奈咁話：「點都好，佢都係黃絲自己友。」但「Nears Gnow」就回應：「佢係黃……不過膠呢。」「LadyKylie in Germany」就話：「佢（曹敏儀）主要都係利用啲page去增加人數，之後推自己個YouTube Channel賺錢。有啲人話佢喺度食人血饅頭。」而「Hong Au」就慨嘆竟然有咁多人讚好呢個假專頁：「過萬人無帶腦！」
其實，借《蘋果》停刊嚟賺錢嘅例子真係隨處可見，話說《蘋果》聲稱噚日最後一期實體版印咗100萬份，唔少平時唔買《蘋果》嘅黃絲為咗打卡都勉為其難買份嚟「悼念」，冇諗過有黃絲即刻把握商機玩炒賣，將平時賣開10蚊嘅《蘋果》用雙倍價錢發售，有人甚至標價二百蚊以至二千蚊不等，「Yue Shiu Chen」就揶揄：「言論自由從來不是香港核心價值，炒賣才是！」 ●香港文匯報記者 雨航
評論