黃絲吹捧到「黃色經濟圈」好團結，但實際上就爾虞我詐。話說一直活躍於「黃圈」嘅童裝店「Chickeeduck」老闆周小龍近日喺荃灣開咗間所謂嘅「藝術生活百貨」，專門賣宣傳黑暴、「港獨」嘅商品，不過，早前好搵唔搵竟然搵着個曾經四圍呃錢、非禮「手足」嘅「連儂畫家」合作，搞到引發起一場內鬥兼恐嚇，周小龍仲一度話要搵律師追究「同路人」，令「黃營」互相分化。
周小龍日前就喺社交平台fb度大呻，稱公司同「連儂畫家」（袁健龍）合作一齊推出A1尺寸嘅大月曆，仲一次過做起咗幾千本拎去賣，但後尾發現尺寸太大，根本唔啱香港家庭用，卒之以低於成本價出售，減少虧損。「cap水」大計行唔通仲要蝕錢，本來已經頭痕，仲要有人突然走出嚟狙擊「Chickeeduck」嘅fb，威脅佢停止售賣所有月曆存貨，否則唔單止會喺網上猛烈攻擊佢，而且仲會去實體店作出滋擾。周小龍起初仲講出「懷疑呢班（人）係藍營指使嚟搞事」「邪惡勢力招數真係層出不窮」等說話，但講講吓先發現，似乎係自己友出嚟指摘佢同臭名遠播嘅「連儂畫家」合作喎。
由周小龍公開同「Bastet Ng」嘅對話圖可見，「Bastet Ng」嬲爆爆咁同佢講：「你識佢（袁健龍）就自己問啦，幾廿歲傻傻下（吓）咁幫個篤灰友」，仲話：「我地（哋）啲委屈咁多、咁耐，佢（袁健龍）走左（咗）去英國無辦法，你仲幫佢刷光環，抵唔抵追究你？」
割埋「同路人」 稱「交律師處理」
而被指同「連儂畫家」「同罪」嘅周小龍即刻撇清關係反駁：「我唔識Otto Yuen（袁健龍），係中間人介紹，我唔知佢任何歷史，亦都冇興趣。我投資咗蝕本project，而（）家要埋尾，你同佢嘅私人姻緣（恩怨），唔好拉我落水，我連見都未見過佢。」
經過同「同路人」嘅一番對話後，周小龍就喺fb發文稱，「藝術生活百貨」一向同唔少藝術家、作家合作，批評「同路人」唔喜歡其中一位合作嘅藝術家，就威脅要所有貨品下架，不過佢就承認今次同「連儂畫家」合作係不歡而散，仲暗寸「連儂畫家」堅持製作A1尺寸嘅巨型月曆，搞到公司要承擔所有資金，強調呢次合作完之後絕對無下次。
周小龍被譏「上得山多終遇虎」
周小龍唔單止同「連儂畫家」「割席」，佢同時割埋「同路人」「Bastet Ng」，聲稱會將恐嚇一事交畀律師處理。
發生一連串嘅事件後，唔少黃絲支持周小龍，覺得「Bastet Ng」喺度分化「黃營」，亦有黃絲覺得周小龍都要負責任。「Tiffany Wong」就話：「你同咩人合作都好，了解下對方喺場運動入面做過啲咩先啦，真係唔識嘅咪問多幾個人囉。」
見住件事愈鬧愈大，周小龍噚日就稱決定暫時放低追究嘅權利，自己日後同自稱「同路人」合作前都會check吓對方背景先。fb專頁「向香港警察致敬」就嘲諷，其實周小龍一直都係靠食人血饅頭，今次都算係「上得山多終遇虎」啦。 ●香港文匯報記者 倪思言
評論