近期好多黃絲都跟風話要移民，但就從來無考慮過自己有冇咁嘅能力，唔少走得成嘅黃絲仲大呻移民之後問題百出，但就估唔到佢哋似乎連基本嘅自理能力都冇，竟然有人問大家點樣帶埋屋企個「姐姐」過去英國。連佢哋啲「同路人」都冇眼睇，覺得佢哋樣樣要有人服侍，根本唔適合喺外國生活囉。

聲稱打算移民去英國嘅「Louis Tam」噚日就喺fb專頁「英國香港人生活交流區」出post問：「如果我想帶埋屋企個姐姐一齊去英國，有乜辦法？如果姐姐自己申請working visa（工作簽證）得唔得？」有網民就質疑佢口中所講嘅「姐姐」到底係指家姐吖定係外傭，而網民都一面倒認為，真係「家姐」又使乜搞簽證呀，應該都係指工人姐姐㗎啦。

見「Louis Tam」咁認真發問，「Leon Brown」就認真咁回應：「可以嘗試domestic worker英國家庭傭工簽證。但要根據英國僱傭條例付最低工資，所以成本應該比較大。」不過，除咗佢之外，其他人都忍唔住笑佢係咪無咗工人就生存唔到。

譏應同老婆離婚 娶屋企「姐姐」

「ICY KWONG」就叫佢：「死左（咗）條心啦，去得外國生活要預左（咗）乜都自己做！」「Venusbabe Tam」批評：「冇左（咗）工人姐姐會死？」有人更譏諷佢：「如果你有老婆，你老婆有BNO，你應該同老婆離婚，跟住娶你屋企個姐姐，咁就得啦！仲使問，好快又一家團聚。」

其實，移民去外國真係要面對好多唔同挑戰，放棄唔到comfort zone又要走嘅人似乎太過不自量力。「Jimmy Tabo」就心水清咁講：「其實好簡單一個例子，香港人朝早慣咗落街，比（畀）幾十蚊食個早餐，嘆（歎）下奶茶，呢邊十個有八個都係（喺）屋企自己煮，煮完要執枱，仲要洗。如果咁都習慣唔嚟，想樣樣有人服侍，英國甚至歐洲都唔太適合香港人。」佢仲話：「外國人多數靠自己，只有傷健人仕（士）先會請人照顧。」 ●香港文匯報記者 鄭治祖