喺黃圈做生意真係要步步為營，否則得罪咗班黃絲保證冇機會翻身。早前，有一隻初生小貓喺灣仔會展舉行嘅寵物節俾柴犬咬死，貓主事後喺facebook揭發狗主不顧而去，大批網民齊齊話要將狗主「伏法」，識得狗主嘅黃店「Pet Pet Express」為咗幫狗主護航，反過嚟質疑「係隻貓行埋去隻狗度」，結果俾黃絲抵制。「Pet Pet Express」嘅店主噚日突然跪低道歉，力數自己「四大罪狀」，可惜黃絲唔收貨，講明即使店主點樣道歉都唔會再幫襯。
話說貓主早前喺fb哭訴自己隻貓死得好慘，希望網民幫忙提供狗主資料，等佢盡力追究。事後，狗主好快就俾網民起底搵到，並被大批網民圍剿。
認識狗主嘅黃店「Pet Pet Express」老闆就喺網上開直播叫網民收聲，更反咬網民排山倒海咁騷擾狗主，仲質疑「係隻貓行埋去隻狗度」，唔少黃絲見到都鬧爆老闆冷血冇人性，表明要抵制呢個黑心老闆。
千字文道歉 認私心護航
事隔兩星期後，當時口硬嘅「Pet Pet Express」老闆突然跪低，仲打咗篇千字文道歉，多次重複話「對唔住」，又聲言自己「因為狗主跟我有商業往來，我一時衝動，出於一己私心，想為他護航，於是我未了解全盤事實就『衝出嚟×』」。
佢又力數自己喺直播期間嘅「四大罪狀」，包括自己嘅態度極唔人道、冇自知之明、用字不當，傷害咗貓主同埋死去嘅小貓，仲喺文末聲稱：「我甘願接受懲罰，亦希望能做些補償。」
一向尖酸刻薄嘅黃絲當然唔會收貨。「Victor Wong」就話：「扮黃都無（冇）用，比（俾）人發現左（咗）係黑心。」「Bao Ja Kim」亦批評：「生意差，佢其實出嚟擦（刷）存在感姐（啫），又博下（吓）×囉。」「Tina Tin Lai」直言：「無（冇）人再幫襯你們啦！唔洗（使）再出post啦！你嘅事業已經玩完。」
「Peggy Li」批評：「嘥氣，一句到尾，咪又係利益行先。」「Carrie Ng」就揶揄：「洗（使）咩道歉姐（啫），應該繼續型落去丫（吖）麻（嘛），你地（哋）都唔怕肉酸既（嘅）！」「Sherman Chau」就揶揄：「你冇錯！千錯萬錯都係銀紙既（嘅）錯！」●香港文匯報記者 雨航
評論