網台「城寨」創辦人劉細良夫婦日前以破紀錄高價4,380萬元賣出北半山豪宅，被唔少黃絲狠斥佢咁疊水都仲要呻窮叫「手足」課金。早前曾入稟告劉細良拖欠版稅嘅潘東凱噚日亦喺facebook發帖，話呢宗成交價比該幢大廈幾個月前嘅相類單位高出千多萬元。原名葉鍵濠的商業電台節目主持「健吾」都問：「邊個會畀多成千萬買樓呢而（）家？」唔少網民聽完質疑佢收錢出賣「手足」，仲話用佢自己嘅捉鬼邏輯，佢好大機會係鬼。
對於劉細良高價賣樓成為黃圈熱話，潘東凱同健吾噚日都踩多腳。潘東凱發帖指：「某夫婦賣北角半山豪宅四千多萬全港關注，比該幢大廈幾個月前一個相類單位出售價高出千多萬。」「健吾」就話：「有人話賣樓唔係問題，邊個買先係重點。係啵，邊個會畀多成千萬買樓呢而（）家？佢地（哋）唔係話香港『冇得救』，8月『全民禁出境』……唔係話香港變集中營㗎咩？根據果（嗰）堆盲粉嘅思考模式，呢個時候，有人高出上手交易一千萬接二手樓，即係有疑點啦？呢個『合理懷疑』，咁佢仲唔係鬼……」
唔少網民都話咁高價接貨有可疑，質疑收錢出賣「手足」。「Clare Tsing」話：「個成交價確實可疑。」「Eddy Poon」就分析：「幾個月賣高出三成，是否合理自己諗，而重點係以城寨良嘅捉鬼邏輯，佢今次重（仲）唔係鬼？賣樓無罪，但用自己把尺都量，佢今次斷正！」
疑涉洗黑錢
亦有網民更懷疑涉及洗黑錢。「Gabrielle Galilea」話：「買樓都係洗黑錢嘅途徑之一。」「Bonnie Hung」就話：「未來會越嚟越多尼（呢）類不正常成交，香港係洗錢好地方，洗乾淨啲錢，走資外國，資金何來，大家都懂的。」「Zackary Sum」就幫返劉細良設計對白：「呢間應該全港最好嘅樓，可以比市值高出千萬成交。」「司徒誠」就話值得查吓：「剩是（淨係）敢接『國父』貨已經夠勁，仲要送多d（啲）錢俾（畀）國父洗（使），真是學陶生話齋，要去田土廳查下囉！」「Tammy Tam」就話：「貪錢貪到出×晒面，肉酸到呢……」
●香港文匯報記者 黃書蘭
評論