修例風波期間，唔少黃絲都話無綫嘅新聞報道「偏頗」，又盛讚離開無綫嘅新聞工作者先有「良心」。無綫新聞主播王俊彥近日離職後喺Instagram撰文，唱衰老東家無綫「這裡太易令人迷失，令人忘記本質」，又話自己由前線記者轉做主播後「更明瞭荒誕背後，原來無可救藥」，結果好多黃絲都留言讚佢。有「連登」網民就好似唔抵得人哋攞光環，於是翻舊賬搵返王俊彥喺2019年8月31日直播講述「831太子站事件」嘅影片，仲列晒佢啲用詞嚟質疑佢根本唔係「同路人」。
IG發文唱衰舊東家
王俊彥離職後喺Instagram撰文，憶述佢呢幾年嘅工作點滴，其中大談讀新聞系嘅佢初初踏上無綫新聞架車嗰陣莫名興奮，因為「無綫新聞」呢四個字帶畀佢自豪感，但「又誰想到一天，新聞車要用白布作遮掩，咪牌要拆掉來躲避」，又話「經過漫長過程，意識到『嚴謹』背後是另一故事。無稽的人和事日日碰面、夜夜上演，是折磨……由前線轉到主播枱上，又大開眼界。轉變崗位不代表轉了角色，記者身份從沒失蹤，反而抽離一點，更明瞭荒誕背後，原來無可救藥」云云。
唔少網民都喺篇文下面留言，讚佢係「有良知和勇氣」嘅香港人，但亦有唔少網民質疑佢突然「醒覺」，好似「leomovie231」就問：「想知你2014年係瞓咗定咩？既然你15年都覺得入到無綫新聞好興奮、好自豪，咁你怨咩呢？條路唔係你自己揀嫁（㗎）咩？而（𠵱）家先黎（嚟）扮醒覺，博乜啫？咁叫有『良心』？你逗（𢭃）咗幾多年糧呀？」
網民翻賬質疑扮「同路人」
「『屎』路比」更搵返王俊彥喺2019年8月31日直播講述「831太子站事件」嘅影片，叫人聽吓王俊彥當時嘅用字，例如「剛才係（喺）中環方向列車既（嘅）警察係作出拘捕行動，都有d（啲）混亂架（㗎）」「有部分乘客或者市民情緒都係相當激動」，等等。
有網民就認為王俊彥都係照稿讀，有啲嘢唔係佢可以控制，但「陳木」就反駁：「要辭職2019就辭左（咗）啦，……Last day講句『香港人珍重』就比（俾）人當『手足』，之前做過d（啲）×街野（嘢）原來咁就抵銷（消）到？」「渡辺徹」就搲晒頭：「真啊，唔知點解有班人好鍾意一廂情願覺得呢啲×街係『同路人』。」 ●香港文匯報記者 雨航
評論