噚日上晝一名年約30多歲嘅男警員，被發現喺灣仔警總辦公室內嘔吐後暈倒，其後證實死亡。一個年輕嘅生命隕落，原本係件傷心事，點知攬炒派沙田區議員趙柱幫竟貼出狗隻嘔吐嘅相片辱警，歹毒至極。有關言論竟獲得不分是非嘅「黃絲」一片叫好，被網民鬧爆佢哋心術不正，口毒心毒。

一名督察昨早返到辦公室，發現一房間嘅房門虛掩，於是查看，發現一名男警攤在床上昏迷不醒，口鼻有嘔吐物，於是報警。救護員到場急救但不幸證實該名男子死亡。

身而為人，都會為呢啲悲劇表示同情，點知趙柱幫竟喺facebook貼出一張狗隻嘔吐嘅相片，陰陽怪氣咁話：「謹記狗唔食得朱古力」，又tag埋警察猝死嘅消息，因此消費、侮辱死者。令人更加難以接受嘅係，竟然仲有唔少「黃絲」迎合呢啲缺德行為，聲言要「開香檳」慶祝有警員猝死，涼薄至極。

facebook專頁「區佬真好做」就製圖鬧趙柱幫，狠批佢借警員猝死抽水發文，再以「狗」辱警，簡直「心毒口毒」，亦批評黑暴支持者趁機喺虛擬世界幸災樂禍。網民「Sze Hung Chan」就話，「做人最緊要唔好幸災樂禍，心腸歹毒，不得善終！」「Jimmy Chan」就質問趙柱幫做過乜嘢地區事務，「自己根本係癈物，得把垃圾口！」 ●香港文匯報記者 杜思文