一班攬炒派區議員近日聲稱要喺大除夕成立所謂「議政平台」，似足「影子議會」，企圖破壞「一國兩制」。不過，隨住社會要求DQ呢啲唔擁護基本法、唔效忠香港特區嘅區議員呼聲愈嚟愈強，多名「議政平台」籌委紛紛喺facebook宣布退出平台籌委會。有「手足」就咁嘲笑班人「驚死」：「咁錫身點搞『革命』？」

該平台醞釀半年，本擬於本月31日成立，但至少三名籌委突然退出，包括身為籌委的公民黨黃大仙區議員劉珈汶、民主黨葵青區議員韓俊賢及沙田區議員周曉嵐等。民主黨主席羅健熙在接受傳媒查詢時則稱，感覺到黨友對加入該平台有「較多猶豫」喎。

劉珈汶死撐：功成身退

劉珈汶日前喺facebook發帖宣布自己退出籌委時，就死撐話自己係「功成身退」：「我已於上周日（12月20日）決定並於昨日（12月23日）正式退出『（香港）公民議政平台』籌委會。」

不過，明眼嘅「手足」就睇出係有人「淆底」。「Fen Go Lam」明寸佢：「咁錫身點搞革命？對唔對得住梁天琦，對唔對得住『手足』。」

去年「7．28」上環暴亂中被捕嘅湯氏夫婦開嘅fb專頁「赴湯」就發帖揶揄班「政棍」：「嗱！唔好分化割蓆（席）呀！兄弟爬山呀！團結一致呀！信『泛民』會當你自己人？以為跪左（咗）就一定有工開？以為每個落場既（嘅）人目標都係民主自由？」

「Connie Lai」就咁話：「咁自我審查，抵俾（畀）人『dq』公民黨。」 「Paul Tong」亦話佢哋「自我閹割」。

可能見到攬炒陣營不滿佢嘅決定，劉珈汶噚晚又再發文，話自己退出同國安法、區議員宣誓或DQ「無關」喎，仲話自己如果驚踩紅線，老早就唔會喺區議會動議，更加唔會應承做籌委喎。咦？唔通佢自己都認呢啲行為全部踩紅線？至於到底係咩原因呢？佢話係「個人考量」喎，然後就鬧爆有人「試圖分化及抹黑議政平台與各板塊之間的關係」嘞。睇嚟「你分化」到今日都仲係「黃圈」嘅萬能擋箭牌呀。

■香港文匯報記者 黃書蘭