香港文匯報訊（記者 雨航）為咗博取嗰班日日話要抵制內地嘅「黃絲」歡心，好多攬炒派政客都走去「黃店」打卡，見到「藍店」更係「避之則吉」，但事實又係點呢？香港文匯報記者近日翻查民主黨前成員許智峯申報嘅區議員辦事處開支償還款額，發現原來許智峯都幾鍾情淘寶貨㗎喎。
話說許智峯去年11月底連任中西區區議員後就換咗個新辦事處，要整個靚靚辦事處除咗裝修，傢俬都好重要㗎。根據許智峯向中西區區議會秘書處申報嘅「區議員開設辦事處開支償還款額申領表」，原來佢喺淘寶用咗1,921.59港元嚟買窗簾，同埋一張價值375.52港元嘅工作枱，運費約276港元。
其實好多港人都會淘寶，貪佢多款又實惠，只係估唔到有攬炒派政客冇跟「黃絲」大隊抵制內地貨啫，事關無論口罩、疫苗定月餅，「黃絲」一聽到「中國製造」就嫌三嫌四，反而大讚幫「黃店」宣傳嘅攬炒派政客。
記得許智峯早前喺fb開咗個「抗疫都要撐『黃店』」系列，仲拍晒片幫人宣傳，唔知佢幾時會拍片同大家分享淘寶心得呢？
評論