成日打着「黃色經濟圈」旗號招攬生意嘅「黃店」好清楚「人一黃腦便殘」嘅道理，成日被爆攞啲內地貨再抬高幾倍價賣畀「黃絲」。呢幾日又有網民喺連登爆料俾「黃店」呃，而間「黃店」為推卸責任，仲要拉埋個「黃代理」落水，完美展現乜叫「齊上齊落」。
網民「阻人收工燒春袋」喺連登發帖，話覺得性用品「黃店」Waddy store最近賣嘅野「愈嚟愈淘寶feel」，「好奇心」驅使下佢就上淘寶網一搵，結果果然搵到一模一樣嘅商品。
一樣都唔緊要，但衰喺Waddy store將件貨嘅價錢定高幾倍。啲「黃絲」「起底」發現，Waddy Store將一套原價38蚊嘅情趣內衣以199蚊賣畀佢哋，仲要標榜件貨係歐美、日本、香港正貨，擺明當「黃絲」水魚。
話「搣時潘」都搵同一代理
個店主回應質疑時就將個責任推畀「黃」代理，仲話連登仔愛嘅「搣時潘」，即係公民黨深水埗區議員劉家衡個老婆潘書韻等都係搵緊同一個「黃」代理呢。
不過，佢呢啲攬炒式嘅回應就未有獲得「黃水魚」接受，仲又搵到破綻話：「話自己係『歐美日本香港貨』你結果就係話自己因為香港代理入貨，……what is the logic?（乜邏輯）」
網民：九成「黃店」消費「運動」
「急凍太陽」就話：「喂大佬叫你唔好淘寶咁簡單都做唔到，唔通真係好似佢咁講心黃就夠？」「利申」就睇得透：「九成所謂『黃店』根本就係消費緊場『運動』，表個態『黃老闆』就包賺錢，消費者喺『黃店』消費就自我感覺良好當『抗爭』咗。」
其實，唔單只係「黃店」講一套做一套，啲「抗爭派」區議員咪又係咁？口口聲聲話要同內地劃清界線，但早前都俾人踢爆話佢哋好多都係訂內地廠製嘅月曆，真係唔知佢哋係撐緊「黃色經濟圈」定「內地經濟圈」呢？ ■香港文匯報記者 倪思言
評論