香港文匯報訊（記者 阿祖）楊千嬅日前到新城廣播宣傳新歌《Live MY Life》。千嬅透露去年完成21個月的巡迴演唱會，在農曆新年前已開始休息：「適逢今年三十周年，歌迷成日問幾時出新歌，自己又準備好唱咩歌，所以過去兩年巡迴一路都有做音樂，新歌已經做咗三四隻，中間又做翻唱黑膠碟項目，現在就開始做新歌宣傳。」有傳千嬅成功申請在紅館舉行演唱會，她大賣關子謂：「8月會有細節公布，自己都等咗好耐，有機會就做，最緊要自己準備好。」
千嬅不經不覺入行三十年，回顧過去經歷人生不同階段，千嬅形容是一個沉澱，她稱：「其實人一出生就係一個修煉，你會遇到唔同起伏，而呢啲起伏係會不停重複，當呢啲起伏再重複時，睇你係用咩心態，每次應該係層層遞進，每個起伏係愈來愈大，因為你有一個人生高度，歲月同呢個世界去量度嘅時候，其實一路係加數，我學緊係減數，而減數嗰樣嘢唔係你能力不逮，又或者你內心軟弱咗，而係因為你個人嘅內核，強大嘅時候，你先覺得有啲事情唔需要執着，應該專注自己想做嘅事，甚至忠於自己感受，去將自己擅長嘅發揮到最好。」
千嬅與丈夫丁子高是「姊弟戀」，二人結婚15年，非常恩愛，被問到兩口子相處之道，千嬅直言雙方性格要合得來，她說：「婚姻並唔係你最愛或激情時候結婚，而係激情過後，對方仍然可以相處，我覺得我都搵到一個好嘅對手去相處。」千嬅指婚姻是唯一一次選擇自己的家人，所以相處的質量比較重要：「當然我哋唔係話結婚好耐，但係有經歷嘅，首先思維同步，我比佢大啲，所以成熟快，某啲事我睇得好開，有啲事可能唔係咁，中間會有啲卡住，但要有耐性去接收大家嘅差距，又願意去等待大家嘅節奏，呢個就要經營。」
評論