香港文匯報訊（記者 子棠）陳慧琳（Kelly）邀得電影好拍檔鄭伊健為前晚（26日）第九場演唱會擔任表演嘉賓，而伊健亦為此特意改機票留港，笑言是為30年前的「神聖之手」報恩，還大爆Kelly私下隨身帶平安膏的反差萌。
Kelly介紹伊健上台時透露，對方原定7月20日擔任嘉賓後離港，卻因颱風延期，最終成功改機票留低。二人合唱《甘心替代你》後，伊健分享一段鮮為人知的往事：「拍《東京攻略》ending時，我要喺零度跳海拍爆炸戲，凍到郁唔到等船接，點知突然見到Kelly伸出『神聖之手』！雖然拉唔到我上船，但佢特登走出嚟，呢份心意我一直記得。」Kelly聽完大笑：「真係全靠隻手！」伊健繼續爆料：「當時拍動作戲搞到肌肉撕裂，Kelly竟然送盒粉紅色平安膏畀我！好感動，但真係唔多襯佢形象。」Kelly即反擊：「以前出埠最鍾意帶，我同你合作多數喺海外，《東京攻略》喺東京、《幻影特工》喺馬來西亞、《盜馬記》喺布拉格，仲有30年前澳洲演唱會，所以今日專登着西芹裙歡迎！」伊健卻笑佢似「Big Bird」，又爆《甘心替代你》係自己首次同人合唱，嚇到Kelly瞪大眼：「真㗎？」在Kelly換衫時，伊健唱了《發現》，現場反應熱烈。
另外，音樂總監雷頌德（Mark）在台上真情告白，好感謝Kelly與她經理人鍾珍，說：「你成日多謝我，搞到好似冇雷頌德就冇陳慧琳，其實冇陳慧琳就一定冇雷頌德！好多謝你請我嚟享受我哋呢30年嘅成果。」把Kelly弄得眼濕濕。而眼看完場時觀眾不肯離開，Kelly感動得加送安歌，笑謂：「把聲開始沙，聽日仲有尾場，真係得返半條人命！」
評論