香港文匯報訊 麥浚龍（Juno）曾預告下年將會再踏紅館開騷，誰料今年年尾Juno已經會在會展先舉辦「The Album」新章節番外篇所延伸的演唱會，日前他與HOY TV 主播俞詠文暢談心情。Juno 坦言沒有預計開這個演唱會：「因為之前都試過將專輯或者電影上嘅角色放上舞台，咁我就諗返『The Album』呢個企劃，而視點唔再喺董折同埋蒲銘心，反而係講佢個囡囡董蒲，再去了解返佢嘅爸爸，而邊個藝人飾演呢個囡囡，我已經有人選㗎喇！ 但係要保持神秘感，到開show你咪知囉！ 」
講到新歌《天與地的距離》，Juno表示這首歌是一個實驗品，希望勾起聽眾這四年來的印象：「點解用父女呢個關係去開show呢？我相信係因為我同我啲貓嘅關係，佢哋咪係我啲小朋友囉。新冠疫情期間，我其中一隻貓走咗，可能呢個係一個啟發，令我去寫一段父女嘅關係。」
問到Juno會唔會想生兒育女，他就斷然拒絕：「如果我係一個爸爸，我相信我係一個好開明嘅爸爸，但係都可以係一個好自私嘅父親，所以其實我唔想做。因為我有太多嘢想做，而做爸爸唔係我嘅to do list。」
評論