關心妍盼與囡囡同台Jam歌

香港文匯報訊（記者 梁靜儀）一連三晚「HKGNA樂在維港音樂節」已圓滿結束，首晚姜濤與韓國女高音曹秀美隔空交流外，曹秀美獻唱多首名曲為音樂節掀起序幕，並由關心妍（Jade）、男團P1X3L接力演出。

Jade當晚夥拍管弦樂團唱出多首名曲，笑言「餓足三年」盼唱戶外騷的她，終於夢想成真，她笑說：「因為疫情都冇咩機會唱戶外騷，呢晚難得同管弦樂團一齊表演，所以揀歌都有啲私心嘅，今次音樂節會轉播去韓國，所以唱韓國改編歌《失戀哲理》，當地人聽唔明都會有回憶嘛，另外仲揀咗唱張學友嘅《愛是永恒》，因為演奏出嚟好有氣勢，我全程都望住囡囡唱，見佢揮晒熒光棒，應該都好投入。」

Jade表示囡囡正學習樂器，希望未來可一齊表演：「因為佢學緊單簧管，唔知佢練唔練得切，下次演唱會就可以唔使打筋斗一齊Jam歌。」

她又透露都想去美加做巡迴演唱會，可以順道探望親友，但囡囡太黐身，海外做騷只能等囡囡學校放長假才可以舉行。