香港文匯報訊（記者 梁靜儀）顧定軒（Zeno）今日28歲生日，昨日他與數十粉絲提早慶生，粉絲除送上生日蛋糕及禮物外，壽星仔自爆知道粉絲買下巴士站燈箱作生日應援後，感動到喊濕了枕頭。
Zeno表示收到每一份禮物都好開心，但第一次收到巴士站燈箱生日應援令他十分感動：「知道粉絲出錢為我買咗燈箱慶祝，前日朝早我打開喺社交平台見到呢個訊息，仲喊濕咗個枕頭，因覺得呢件事好有心，多謝佢哋。」
談到生日願望，Zeno說：「希望身邊人都開開心心，自己可以做多啲好作品，遇到多啲機會。（如何慶祝？ ）都係同屋企人簡簡單單食餐飯，我係好少有慶祝活動，即使朋友約食飯，我都話千祈唔好買蛋糕同唱生日歌，因為覺得好尷尬，反而食餐飯大家有個機會聚吓就已經足夠。」
他坦言過去一年因「收埋自己」，所以很久沒見大家，到今年終於搵到自己想發展的方向，就是做音樂，他說：「年頭出咗第一首歌，現在做緊第3首歌，（可有信心角逐今年的新人獎？）冇諗呢啲嘢，我有信心做好自己嘅作品，其他嘢真係控制唔到，希望支持自己嘅人感受到，或者能用自己嘅作品畀多啲能量人哋已好開心。」
梁洛施為江美儀慶生
另外，明日是江美儀的50歲生日，人緣好的美儀獲多位好友為她預祝生日，但最意想不到的是梁洛施（Isabella）原來也跟她老友鬼鬼。前日美儀上載與Isabella的合照，並寫道︰「多謝你同我預早慶祝生日，重（仲）搞到我好怕醜！繼續慶祝生日月！」不少網友均對她倆原來交情這麼好感到驚訝又好奇。
評論