香港文匯報訊（記者 梁靜儀）周嘉洛、陳瑩、朱敏瀚（朱仔）及王灝兒（JW）、黃建東及安德尊等，昨日到電視城出席劇集《痞子殿下 》宣傳活動，眾演員分組玩考驗記憶力遊戲，輸了被懲罰的嘉洛，全身被夾滿晾衫夾。對於觀眾拿他與當年周星馳（星爺）比較，他稱只是自然演繹，沒有刻意模仿星爺。而朱仔扮女人亦大獲好評，他自爆小時候曾被母親「當女湊」。
劇中嘉洛不單要反串扮女人，更會與飾演「鹹濕國師」的黃建東有床戲，嘉洛說：「都係離唔開畀佢摸手摸大髀，拍攝時不單打冷震，絕對感到不安，（有冇咀？）沒有咀，但意識上交代咀咗，不過拍攝時係借位。（有冇試過同性向你示愛？）冇咁嘅福氣，可能自己比較遲鈍同性格比較內斂，自己都少蒲，（同陳瀅拍床戲作補償？）可以同佢開工已經係着數，唔使咩補償。」
周嘉洛無刻意模仿星爺
劇中有搞笑演出的嘉洛，對於觀眾拿他與當年周星馳（星爺）比較，問到可會感壓力？嘉洛說：「唔會，其實冇人可以同佢（星爺）比較，可能大家受星爺影響深遠，見到我自然做出來嘅演繹，大家就會諗起星爺，一來完全不能媲美； 二來我冇沒刻意模仿，自覺仲有好多不足及改善嘅地方，所以強烈要求公司開拍續集，如果成事就好開心。」
對於《痞子殿下》播出以來收視不俗，一直維持廿多點，比由幾位視帝視后主演的《白色強人II》稍勝，對於打低視帝視后，嘉洛說：「真係唔可以用打低咁講，收視上數據都係贏少少，因為9點半時段同喜劇有少少優勢，同埋收視係要配合天時地利人和。」陳瀅則說：「喜劇係有優勢，大家食飯時想睇啲輕輕鬆鬆嘅題材，又吸引到一班小朋友。」問到可有信心憑此提名視帝視后，陳瀅說：「我哋有信心提名最佳組合、最佳劇集同最佳劇集主題曲，不過唔係嘉洛唱嗰隻，佢慳啲啦，係JW王灝兒嘅片尾曲，不過嘉洛都唱得唔差。」問到嘉洛會唔會進軍樂壇？他說：「專心做好演員先，做演員好辛苦，唔好搞咁多其他嘢。」陳瀅透露近日剛完成台慶《美麗戰場》拍攝，因睡眠不足，現在最想補眠，她也覺得導演很犀利，拍了兩個月已煞科，因劇集10月播出，近日已經要做宣傳工作。
朱敏瀚於劇中首次反串扮女人，對於獲得大家好評，他坦言意想不到，並笑說：「靚過港姐，一着咗女裝我就上咗身好投入，媽咪同身邊朋友都話我可以參加選港姐，如果早5、6年前扮女人，皮膚白啲更加靚，𠵱家曬黑咗又好大隻，自己睇都幾恐怖，見到大家幾鍾意，又可以試吓呢類角色。」首次扮女人又稱一着起女裝就會不覺地成身郁，監製卻覺得效果幾好，他也覺得幫到投入角色。
他又自爆小時候媽咪生了兩個兒子後，本想追個女，可是第三胎依然生仔，所以曾將他打扮成女生般，他說：「媽咪將我留長髮同中性打扮，滿足佢生女嘅夢，（有冇心理陰影？）好彩我冇乜印象，都係睇相至有返啲回憶。（你生個孫女畀佢囉。）連另一半都未有，不過兩個哥哥已經結婚，會鼓勵佢哋生B。」
評論