連剝4隻智慧齒致臉腫 孔德賢自覺似巴斯光年

香港文匯報訊（記者 梁靜儀）TVB藝人孔德賢（Danny）在社交平台上載多張臉腫相片，原來他連剝了4隻智慧齒，更以長文分享慘痛苦況，又自嘲似面腫似巴斯光年。

Danny表示其實7年前讀大學那時，牙醫已經建議他盡早剝智慧齒，但他一直當沒事，他說：「上排兩隻智慧齒因為太入擦唔到蛀晒，下面嗰兩隻打橫生，仲要得一半出咗嚟，積住啲細菌搞到定期發炎，提醒我有佢哋嘅存在。」最後Danny把心一橫一次過剝4隻智慧齒。

Danny說：「剝之前牙醫拎住一隻又大又粗嘅麻醉針，打咗六七下，其實唔係咁痛，然後慢慢成個口就冇晒感覺。只係聽到好大聲嘅電鋸聲同埋吸口水嘅聲，仲有感覺到牙醫好大好大力咁撬我啲牙，嗰種恐懼感，同做激光矯視差唔多，都係嚇到標冷汗。好彩個醫生出名手勢好（收費貴），10分鐘剝晒4隻，完全唔痛。做完個手術出返去，啲姑娘好似好擔心咁，係咁問我有冇頭暈頭痛想嘔？我心諗咁大鑊？唔好嚇我呀。佢哋仲提我要不斷吞口水，又提我要不斷敷冰，如果唔係會腫到比卡超咁。我聽到之後仲好興奮，話好想睇吓自己會變成咩貓樣。」

Danny指手術後第一日整個口麻痹，第二日面部開始腫，但依然擘不開個口，全日都只是食粥及生果，連食菜同肉都要剪碎，還笑說：「但我自己就覺得似巴斯光年多過比卡超。」第三日雖然沒有再腫下去，開始可以擘開個口及進食。但到第四日依然未消腫及食唔到飯，還要個口生痱滋，他便開始轉用暖敷，用暖包貼上臉，希望增加血液循環快些消腫。