香港文匯報訊（記者 梁靜儀）楚原共執導過120多部電影，經歷過高低起跌。除了2018年榮獲第37屆香港電影金像獎頒發「終身成就獎」外，他於1998年第17屆香港電影金像獎獲頒「專業精神獎」，並憑着《孔雀王朝》在1979年第25屆亞洲影展奪得「最佳動作片導演」。
大家都難忘楚原在第37屆香港電影金像獎典禮上發表得獎感言，大量金句蘊藏大智慧。他記得當年在邵氏，由最幸福的導演，淪落至最難堪的導演：「我破咗香港賣座紀錄，老闆即刻同我簽張新合同，人工加咗十倍，個個都話我係香港最幸福嘅導演，十幾年後我嘅戲唔賣錢喇，拍完幾部仆街片，就想拍《天龍八部》，開鏡前一日，方逸華小姐出嚟撕咗張通告唔畀拍。入到寫字樓第一句就問我：『邊個畀你拍《天龍八部》，蝕咗本你有得賠咩？』最後兩句就話：『楚原，你根本唔懂電影藝術，你根本唔識拍電影，嗰時人人都話我係邵氏公司最難堪嘅導演。」
看透人生的他又說：「但人生呢兩個字，就係歡聲同淚影，呢四個字砌成，冇乜奇怪吖！任何人，無論你噚日幾風光，亦無論你噚日幾失意，聽日天光你一樣要起身做返一個人，繼續生活落去，因為明天總比昨天好，呢個就係人生。」
楚原又以打麻雀比喻人生：「唔講你唔知，人生原來同打麻雀一樣，有東南西北風，你打到北風又係另外一個人生。如果你好似我咁，老到冇得撈，記得後生剩返個錢，老到好似我咁，連終身成就獎呢個老人牌都攞埋，咁你就應該『管他天下千萬事，閒來輕笑兩三聲』。到老時候，無論外面發生咩事，『管他喜怒哀樂，管他恩怨情仇』，全部都當係菩提明鏡，笑吓就算，古今多少事都付笑談中，最後，我送畀大家我喜歡嘅幾句說話：『當你回首往事，不因碌碌無能而悔恨，不為虛度年華而羞恥』，咁你就可以好驕傲咁同自己講：『你，無負此生』！」
評論