香港文匯報訊（記者 梁靜儀）袁偉豪、黃智雯、王敏奕、劉穎鏇、丁子朗及郭子豪等，昨日出席於將軍澳電視城舉行的《把關者們》 之「緝拿 Big Boss 行動」，袁偉豪與黃智雯更拖着劇中愛犬Carson現身。黃智雯爆裂性演技受激讚，引起觀眾共鳴，袁偉豪力撐黃智雯一定要獲提名角逐最佳女主角，更希望她奪得香港區殊榮。
袁偉豪日前為太太張寶兒慶祝30歲生日，兩人在酒店Staycation慶祝，他笑言：「好彩收工早有時間慶祝，去咗半日Staycation，下個月又到結婚周年，呢段時間比較忙，未有計劃點慶祝，但都有諗定送咩禮物，睇吓當時佢有咩需求。」談到新婚生活，袁偉豪表示這一年已適應了，去年這段時間他正拍攝《把》劇，同時要兼顧籌備婚事，所以拍此劇時好有感覺，因戲裏戲外都結婚，戲內他就與黄智雯結婚。說到他昨日偕同劇中愛犬Carson現身，袁偉豪表示以前都有養過狗，近年因工作較忙就轉為養貓，因覺得養狗需要較多時間陪伴。
黃智雯在劇中不幸小產，她表示收到很多觀眾私訊說很緊張她與袁偉豪的感情變化。袁偉豪則指很開心很多朋友鍾意智雯的爆裂性演技，因他們認識了十多年，一齊在公司打拚經歷了很多，見到她可以再在角色演繹有更多層次是很開心。黃智雯覺得情緒戲是很難令觀眾有共鳴一齊喊，但聽到很多觀眾說那兩集都跟他們一齊喊，她都很想多謝袁偉豪，還特別多謝同劇的葉凱茵無私分享流產經歷，對她的演出幫助了很多。問到可有信心獲提名最佳女主角？袁偉豪即力撐智雯說：「提名一定要，我哋都係爭香港區未攞，之前我哋喺新加坡及馬來西亞都攞咗，智雯憑《三個女人一個「因」》攞獎，我就係《棟仁的時光》攞獎，沉澱咗兩三年過後又再重拾自信。」黃智雯認為有獎當然開心，但觀眾有共鳴已是好大的肯定，又笑言拍住袁偉豪有運行。
王敏奕想學揸電單車
王敏奕表示近日正忙於拍攝另一齣新劇《法證先鋒V》，戲中飾演有幹勁的女警，並會跟黃宗澤飾演的法醫有感情發展。她表示日前拍了揸電單車戲份，雖然只是扮揸，但都有興趣去學，因為個感覺好似滑雪，感覺好爽，但在香港揸電單車可能在夜晚兜風便算。問到老公曾國祥不擔心她揸電單車有危險嗎？她說：「應該都會怕，我一同阿媽講佢都會驚。」
她透露老公曾國祥7月已去了英國拍劇，可能還要拍多四五個月才返，她說：「都幾羨慕佢好似去咗旅行咁，有時又會去歐洲唔同地方睇景，雖然都好辛苦，但都係另一種享受。（會唔會去探老公？）唔得，因為要拍劇，冇辦法過去，只能靠視像見面。」說到當地有疫情，問她可會擔心？她說：「嗰邊又有另一種防疫方法，大家好似自由啲，好多人自由啲冇戴口罩，香港就算零確診，大家都仲係好小心，所以唔可以鬆懈。」
劉穎鏇拒愛感難受
另外，劉穎鏇在劇中向丁子朗示愛被拒，但同時她又拒絕了孔德賢，她表示有網民留言替她不值，並笑言當初收到劇本後都感到好混淆好掙扎，若現實中發生這件事也不知如何處理。問到她可曾向人示愛而被拒絕？劉穎鏇自言細膽，未夠膽向人示愛：「我個人好被動，未試過向人示愛，唔夠膽，中學時試過拒絕人，嗰種感覺非常之難受，因為唔知點樣同人做返朋友，雖然之後都做到朋友，但點都有啲尷尬。（現時若遇到真愛會唔會主動爭取？）嘩，覺得家仲驚，以前讀書經常見到同學，有其他朋友在場，件事可以快啲淡化。」
她又强調目前沒有拍拖，工作為先，又稱最近忙於拍攝新劇《隱形戰隊》，打到周身瘀傷，還要吊威吔。問到緋聞男友胡㻗有沒有呵返？她帶笑說：「冇呀，冇時間做啲咁嘅事，大家都真係好忙。」
評論