蘇民峰睇「腳相」點評 倪嘉雯獲看好嫁入豪門
香港文匯報訊（記者 梁靜儀）蘇民峰夥拍倪嘉雯（Carmen）、陳若思（Amber）、陳國麟（Doniven）與及新加盟的黃嘉雯（Carmaney）主持的《呢鋪開乜︰開壇》，今晚(15日)師傅會教觀眾睇「腳相」。
三位女主持有備而來，名正言順穿上熱褲、露趾鞋騷美腿，事前亦做足準備，應師傅要求着露趾鞋的Carmen說︰「一年四季都會搽cream，每次都會搽埋腳板、腳掌。同埋我淨係會着波鞋，會避免着平底同高踭鞋，不止易攰又會暴露空氣中，令雙腳乾燥及甩皮，特別是高踭鞋，擔心會搞到小腿發達，影響腳型。」
Carmaney則表示沒有特別護理，只是盡量不撞瘀及剃（腳）毛︰「不過做咗laser之後冇呢個問題。同埋唔好曬咁黑，太黑冇咁好睇。」
倪嘉雯自言仍享受單身
她們又在蘇師傅面前展示步姿點評，其中Carmen被讚完全具備做闊太的條件，雖然被指有點外八字，但腳型一流，腳腕夠幼、小腿稍微有肉。Carmen對於被讚靚腳兼有闊太相，她卻稱未想過嫁入豪門︰「單身咗4年半近5年，暫時冇對象，都享受單身生活，覺得幾自在。平時鍾意留喺屋企做自己嘢，得閒出去見朋友，將來當然都想組織家庭，不過目前冇渴求識男仔。」
香港小姐出身的Carmaney雖然行得有型有格，但被發現其中一隻腳有內八字，不過蘇師傅話可以後天改善兼轉運。
Carmaney自爆小學本來是田徑隊成員，因為聽大哥講跑得多會令腳粗，所以第二年便退隊。她又承認本身有少許入字腳，教練指做gym可以糾正。
