【網議政事】屢食「血饅」呃「同路人」 黃店改名續cap水
口講「齊上齊落」，大家以「同路人」互稱嘅「黃色經濟圈」，一直有唔少黃店被踢爆原來暗啞底出盡蠱惑招數去呃班「同路人」。近日，有連登仔喺連登討論區發文踢爆最近社交平台出現名為「quit.gor」嘅page，原來前身係臭名遠播嘅黃店「pepe.HK」。改個名就想出嚟繼續呃人，唔少黃絲知道後都表示曾經中伏，仲要扯出個背後老闆好似係慣犯，話佢學生時期就已經招搖撞騙呢。
曾抄畫 298蚊賣畀「同路人」
有連登仔日前就喺連登出post表示，希望一眾黃絲小心「quit.gor」呢個社交平台page。點解？佢話呢個page嘅前身係多次食「人血饅頭」嘅「pepe.HK」（分身為「accstore」），過往曾經賣啲貨不對辦嘅口罩畀班「同路人」之餘，仲多次收錢唔出貨。唔單止咁呀，「pepe.HK」仲被指曾經抄襲俄國畫家作品，以每幅298蚊嘅價錢賣畀一班「同路人」，積極cap盡每分每毫。
儲儲埋埋咁多劣行，見住cap水嘅空間大大減少，「pepe.HK」就好似醒水咁改名做「quit.gor」，博班「蠢黃」唔記得後又可以繼續呃錢。個連登仔列出嘅證據中，都有唔少網民覺察呢個問題，喺「quit.gor」IG第一個post度詢問「pepe.HK」去向，甚至直指「quit.gor」嘅前身就係「pepe.HK」。
被指讀書時期已招搖撞騙
睇返「quit.gor」嘅IG同fb，發現佢隔一段時間就推出唔同嘅cap水方案，一時又叫人搵佢哋落廣告，一時又推銷「台灣黑色口罩」。唔少黃絲都鬧爆佢，仲要希望「同路人」唔好再俾人呃。
有黃絲更分享咗自己中伏嘅經驗，好似「天溢」話：「accstore呢間濕×嘢，只係將啲淘寶貨定貴幾倍價，然後打折呃人好平。」「西内まりや」就話：「比（俾）佢搵左（咗）苯（笨），個（嗰）時180蚊買100塊濕紙巾仔，好on×。」「StonecuttersI」更懷疑係老闆嘅舊識：「呢件垃圾由讀書時期已經招搖撞騙，仲有佢身邊班同黨。」
雖然班黃絲知道自己做咗水魚後開始怨聲載道，仲嬲爆爆咁「內鬥」黃店，不過相信只要黃店改多幾次名，班淨係識得分顏色嘅「蠢黃」咪又係會繼續盲撐。
●香港文匯報記者 鄭治祖
