【網議政事】「612」邊呻窮邊養義務律師
稱剩3600萬籲捐款 竟撥逾千萬搞資助計劃
趁去年唔少暴徒被捕，「612人道支援基金」向「黃絲」籌咗逾1.6億元去「支援手足」。明明咁大筆數，信託人之一嘅吳靄儀日前就呻「612基金」開支急增，要大家繼續捐款，先應付到未來年半嘅支出。不過，佢又話為咗畀年輕律師累積經驗，「612基金」要再撥備過千萬元，推出所謂「第二位大律師」資助計劃。呢頭呻窮，轉頭又話要使過千萬畀年輕律師「累積經驗」。唔少網民都覺得「612基金」班所謂嘅「義務律師」不過係假義務，「律師不為錢為正義？咪講笑啦，狀棍！」■香港文匯報記者 黃書蘭
吳靄儀日前聲稱，現時「612基金」嘅存款只剩返約3,600萬元，而「612基金」要再為所謂「第二位大律師」資助計劃撥備逾1,500萬元，等啲同被告「手足」「建立咗互信」嘅大律師，可以繼續支援已經有法援律師嘅被告，「讓更多未獲得足夠經驗的年輕律師透過參與案件累積經驗。」
聲稱讓年輕律師儲經驗
唔少同路人聽到原來「612基金」咁快用咗咁大筆錢，仲諗住請埋啲無經驗嘅「義務律師」嚟「累積經驗」，都大嗌掠水。「熱血公民」副主席鄭錦滿日前就喺facebook發帖揶揄所謂「義務律師」根本就會收錢，「有冇聽過『義務手足』、『義務抗爭者』呀？預設係冇錢收，咪冇呢啲詞彙囉。……我尊重專業㗎，收費係應該嘅，咁但係就唔好叫『義務律師』丫（吖）嘛。」「Wong Wong Peter」就話：「律師唔可以收順啲咩，為了『手足』應該義務啦。簡直係吸血鬼，食人血饅頭。」「Jacky Chan」亦問：「點解律師唔收平啲？」
「羅開」就解釋：「啲律師知道有讚（贊）助會否獅子開大口，例如醫生知你買了保險，知道賠償金額後就會claim（索償）盡。」
有「手足」就鬧爆呢個所謂「第二位大律師」資助計劃。好似fb專頁「黑群義工」就發帖話呼籲大家停止對「612基金」及「星火」捐款，話佢哋幫唔到「手足」。「Tesco Lau」就爆晒粗：「叫人捐錢比（畀）你啲新律師學野（嘢）？攞啲『手足』前途去試，去攞經驗？出黎（嚟）呃錢食人血饅頭就行×開啦，咪再呃香港人！」
網民譏變「教育基金」
「Yip Chan」形容：「所謂『救人基金』變『教育基金』，呢啲咁正既（嘅）騙案，不勞而獲的律師團，咁就用到個（嗰）幾千萬，淨（剩）返一千萬既（嘅）時候點算？到時佢會話唔夠錢，告急！又可以（繼）續玩幾年。」
民建聯立法會議員葛珮帆都話：「如果咁偉大要幫班『手足』，咪唔好收律師費囉！叫人去衝、去送頭，原來為咗賺過億律師費！」
