「Lunch仔」捱鬧扮縮 網煽分化還拖
憑藉睇報紙、嗌口號就輕鬆攞到「光環」嘅「Lunch仔」，?家儼然成為諸多「手足」嘅眼中釘，唔單只「同路人」喺網上繼續批鬥佢，噚日佢搞緊「和你睇《蘋果》」時，仲被人喺鏡頭前兜口兜面鬧咗超過5分鐘，數晒佢分化、性騷擾「女手足」等「罪狀」。早就表明當聽「同路人」意見係練習情商嘅「Lunch仔」，喺現場表現出睬「手足」都傻嘅姿態，但轉頭噚晚就喺網上上載嗰位「同路人」嘅相，仲感謝幫佢出聲嘅支持者，又附上篇讚自己踩「同路人」嘅帖文，等啲人推上Twitter。呢部互鬧對方分化，自己都分化嘅戲碼，真係大把花生。
要論內心強大，必須數「Lunch仔」：先喺法庭送車時嗌口號、擋囚車去路，搞到還柙嘅「工程巴」家人冇辦法送車道別；繼而打壓同路人言論；再到噓走對佢「不滿」嘅「手足」；甚至威脅報警等「罪狀」而被幾十個Telegram（TG）頻道休台一周以示譴責，日前佢又被爆性騷擾「女手足」，而呢啲都冇影響到「Lunch仔」「抗爭」嘅決心同鬥志。
認發淫照扮死狗博同情
佢噚日繼續搞「太古和你睇《蘋果》」，不過就有「同路人」到場譴責佢搞咗咁多錯事都唔道歉，搭港鐵，搞分化，根本唔尊重「手足」，亦對唔住「女手足」，講到情緒激昂。但「見慣大場面」嘅「Lunch仔」只係雲淡風輕回應句「不需要向你交代」。加之周邊幾位「Lunch仔」粉絲幫手，鬧個「同路人」篤灰，呢啲唔和諧因素好快就敗走。
之後熟門熟路嘅「Lunch仔」就「扑咪」回應香港文匯報噚日報道佢性騷擾「女手足」嘅醜聞，佢再次承認有向人發送露械照，但重申件事係「你情我願」，仲話張相只係由網上下載嚟「裝假狗」，又扮慘形容事件令自己有陰影，搞到?家同異性傾偈都唔敢。
鼓動盲粉唱衰鬧人者
講到好似好細膽嘅佢，報起仇嚟就從不手軟。「Lunch仔」噚晚喺facebook同Instagram發帖，感謝「太古街坊」同「直播網友」趕走鬧佢嗰個「同路人」，仲貼出人哋嘅相，寫埋英文帖文揶揄鬧佢嗰位「同路人」：「太年輕，唔識得處理衝突」，揶揄佢「情緒太多、太喪，需要冷靜同睇輔導員」，仲要讚埋自己「無視」嘅做法正確，要求啲人將個文本推上Twitter，即時贏得一批支持者附和。
「容總」寸自high扮「星」
不過，網絡世界對「Lunch仔」嘅聲討都絡繹不絕。因黑暴期間影相而出名嘅「KEVIN CHENG」噚日就喺facebook專頁「- KEVIN CHENG PHOTOGRAPHY-」連發三帖，狙擊「Lunch仔」。佢不滿有人要人去太古城「撐David（「Lunch仔」），保護David」，又寸「Lunch仔」粉絲得把口講又唔會去現場支持。而《輔仁媒體》總編輯容樂其都插口諷刺「Lunch仔」嘅團隊名：「乜×野（嘢）叫星級抗爭團隊……」
網民「Kelikala Deer」話：「人血光環真好戴，叫我Dinner哥，因為近排晚市開返，晚晚搞個和你Din。」「Julian Leung」就指：「連lunch哥都要搵人保護，咁台灣過（嗰）5個手足點解無人問津。」「同路人」都揶揄埋「Lunch仔」嘅鍵盤支持者，「Wolf Yeung」話：「欣賞佢一個人都照落場！如果我落埋去咪變兩個人？」「魏偉」諷刺：「要吹冷氣，不了。」「Zekku Wong」都無奈：「『抗爭』變追星。」
■香港文匯報記者 文根茂
