封街拍舞火龍場口 陳豪舉70磅龍頭
香港文匯報訊（記者 梁靜儀）陳豪、張曦雯、馬貫東、丁子朗、劉佩玥、譚凱琪主演的無綫劇集《俠醫》，將於9月1日播映。在首集播出的大坑夜舞火龍場口，動用了超過200名台前幕後及大坑舞火龍團隊派出的義工，並臨時於半夜封了數條街進行拍攝，相當大陣仗。
劇組及演員事前花了大量時間綵排，陳豪舞動的火龍及馬貫東舞動的龍珠，上面的每支香均由工作人員即場逐支點燃及插入。為了拍出最靚效果，劇組前後換了八至九次香，製作認真。
陳豪透露：「因為啲香差唔多燒45分鐘就會變短，為咗拍出嚟嘅效果靚啲，大概每45分鐘就要換晒條龍上面同埋龍珠上面嘅所有香，都辛苦啲工作人員。」為免香灰掉落時灼傷皮膚，陳豪手上包了不少繃帶。而龍頭本身有一定重量，加上插滿香，故舞動時發生了小意外，陳豪說：「今次舉龍頭嘅經驗可以話係集合體能、力量同埋技巧，同埋因為太重嘅關係，都試過有一刻握得唔穩、成個龍頭差啲跌落嚟，好彩最後無事。」陳豪太太陳茵媺及子女亦有前來探班欣賞盛況。
陳豪又笑言馬貫東比自己更辛苦，馬貫東反笠高帽，指自己舞動的龍珠重約20磅，但陳豪的龍頭則重達約70磅，故對陳豪佩服不已：「Mo哥（陳豪）就算拎住個龍頭擺甫士，佢都辛苦過我好多。Mo哥舉住個龍頭舞足一條街，跟住佢放低係可以面不改容繼續演戲，真係令人好敬佩。我都有試舉過個龍頭，三秒左右已經唔太平衡到，所以Mo哥真係好勁。」
