鄭秀文即興邀電影老拍檔合唱 小齊被笑「浪花」變「老花」
香港文匯報訊 鄭秀文（Sammi）前晚在紅館舉行第四場《You & Mi 鄭秀文世界巡迴演唱會香港站》，好友任賢齊（小齊）、蔡卓妍（阿Sa）、導演莊文強等捧場。Sammi換上黑色水晶短裙與表演嘉賓陳凱詠（Jace）合唱《煞科》，Jace毫無怯場，跟Sammi在台上又唱又跳，還加入一段rap助興，全場High爆。其間Jace興奮高呼：「好夢幻呀，我同Sammi一齊唱歌呀！」
唱完後二人擁抱，Sammi說：「每一個歌手都係由新人開始，當初好多前輩歌手畀咗好多機會我上舞台，我先至可以慢慢一步一步行到今天，我都希望今次演唱會，可以同啲比較新晉嘅歌手分享。」Jace表示第一次踏上紅館舞台，說：「感覺太神奇，好正呀，咁近距離感受Sammi嘅energy。你超好地鼓勵咗我好多，因為之前一段時間唔係好容易過，但Sammi超好，私下同我講咗啲說話，令我覺得我真係要加油。」Sammi繼續鼓勵道：「長路漫漫，前面嘅路係你哋㗎啦，你要加油呀！」
演唱會尾聲，全場大叫「安歌」，Sammi演唱新歌《盲盒》後，介紹24年前與她合拍電影《夏日的麼麼茶》的小齊也在場，小齊在觀眾席上拿起咪高峰跟觀眾打招呼，全場歡呼，小齊笑說：「『麼麼茶』一路喺馬來西亞嘅熱浪島等Sammi返嚟，等唔到，我就嚟香港搵你！點知我一返嚟香港，個個叫我『秋哥』，因為《九龍城寨之圍城》！」Sammi興奮地說：「恭喜你，過億票房！」
小齊表示好期待再跟Sammi合作拍電影，說：「你攞獎嘅時候，我仲開心過自己攞，好感動！」Sammi說：「終於攞到啦，Yeah！有夢想唔好放棄，70歲都係攞獎時，你加油，演技再進步啲呀！」然後小齊即興與Sammi唱了一段電影《夏日麼麼茶》主題曲《浪花一朵朵》，不過Sammi笑指他將「浪花」說成「老花」，廣東話有待進步，全場爆笑。
